Odesada aprelniñ 30-ı sabasına Rusiyeniñ gece ücümi neticesinde yaralanğanlarnıñ sayısı 20-ge arttı, 17 yaşından 70 yaşına qadar insanlar, dep bildirdi vilâyetniñ arbiy memuriyet yolbaşçısı Oleg Kiper.
Şeer arbiy memuriyetiniñ yolbaşçısı Sergey Lısak yaralanğan 16 kişi aqqında haber etken edi.
"Eki insan şimdi ağır alda reanimatsiyada buluna, ekimler ayatları içün küreşe. Bir adam travmatologik bölükke alındı. Diger yaralanğanlarğa yardım kösterildi ve evlerine tedaviylenmeleri belgilendi", – dedi vilâyetniñ arbiy memuriyet yolbaşçısı.
Lısaknıñ aytqanına köre, Rusiye ordusı şeerniñ farqlı rayonlarında mesken kvartalları ve vatandaş obyektlerine ücüm etti, eñ çoq zarar Primorskiy rayonında qayd etildi. "Mında çoq qatlı bina ve beş qatlı mesken ev zarar kördiler: yuqarı qatlarda ve damda büyük yanğınlar çıqtı, qurtarıcılar olarnı söndürip oldı. Şeerniñ merkezinde mustaqil evler ve mesken inşaatı zarar kördi", – dep bildirdi vilâyetniñ arbiy memuriyet yolbaşçısı.
Onıñ qoşqanına köre, içtimaiy ve ticariy obyektler darbege oğradı: bala bağçasınıñ binası büyük zarar kördi, alış-veriş merkezi, musafirhane ve memuriy binalar zarar kördiler, onlarnen avtobus ve yengil maşina yoq etildi ya da zarar kördi.
Odesanıñ Hacibey rayonında, Lısaknıñ aytqanına köre, infrastruktura obyektleri, anbar binaları ve garaj kooperativine darbe endirilgeni qayd etildi.
Bundan evel yaralanğan altı kişi aqqında belli edi.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.