Odesa rayonında aprelniñ 8-ge keçken gecesi Rusiye dronınıñ urması neticesinde logistika-naqliyat obyekti zararlandı, dep bildirdi vilâyetniñ arbiy memuriyetiniñ reisi Oleğ Kiper.
"Gece duşman Odesağa dronlar ile ücüm etti. Ava mudafaası quvetlerimiz dört dronnı yoq etti. Teessüf ki, Yazıq ki, Odesa rayonında zararlama bar. Naqliyat obyektine zarar ketirildi. "Şahed"niñ yıqılğan parçaları ile yaqıt stantsiyası da zarar kördi. İnsanlar yaralanmadı", – dep yazdı o telegramda.
Ukrayina cenübiy mudafaa quvetleri bildirgenine köre, gece işğalciler daa bir kere Cenübiy regionlarğa "Şahed-131/136" tipindeki uçucısız uçaqlar ile bir qaç darbe endirdi.
"Duşmannıñ nişanı kritik infrastruktura edi. Ava mudafaası quvetleriniñ küçlü arbiy işi tahminen üç saat devam etti. Cenübiy mudafaa quvetleriniñ ameliyat zonasında yedi baraj qurşunını qullanıp oldılar: dörtü Odesa vilâyetinde, ekisi - Mıkolayiv vilâyetinde, biri - Kirovoğrad vilâyetinde tüşürildi", – dep aytıla haberde.
Ukrayina Silâlı quvetleriniñ Baş ştabında saba bildirdiler ki, ava mudafaası küçleri gece Rusiye tarafından endirilgen 24 "Şahed"niñ 17-sini urıp tüşürdiler.
Ukrayina Arbiy ava quvetleriniñ komandanlığında qoştılar ki, RF ordusınıñ dronları işğal etilgen Qırımnıñ Çauda burnundan, em de Rusiyeniñ Kursk ve Eysk rayonlarından uçurıldı.
Rusiye arbiyleri çeşit silâlarnen muntazam sürette ukrayin regionlarına ücüm ete. Delillerge ve şaatlıqlarğa baqmadan, Moskva, tam bir istilâ başlağanından berli, vatandaşlarğa nisbeten yapılğan ücümni red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
