İyünniñ 18-nde Odesa limanına eki NATO gemisi kirdi. Büyük Britaniya ADQ-niñ «Defender» eskadron mina taşıyıcısı (HMS Defender, D36) ve Felemenk ADQ-niñ «Evertsen» Ava mudafaası fregatı (HNLMS Evertsen, ili Zr.Ms. Evertsen, F805), dep haber ete Azatlıq Radiosı.
İyünniñ 14-nde olar Qara deñizge kirdi ve evel kelip çıqqan Amerika gemisine qoşuldı.
«Bölgedeki ortaqlarımıznen: Ukraina, Romaniya ve Gürcistan ile qarşılıqlı işbirlikni tasdıqlağan arbiy-deñiz ameliyatlarında iştirak etmek içün Qara deñizge ketip HNLMS Evertsen beraber Bosfornı keçtik», – dep haber ettiler o zaman HMS Defender-niñ resmiy Twitter saifesinde.
Rusiye de öz nevbetinde adetince deral Qara deñiz flotunıñ quvetleri ve vastaları NOTO memleketleriniñ eki gemisiniñ «areketlerini nezaret etip başlağanını» bildirdi.
Aynı böyle bildirüvni Rusiyeniñ Mudafaa nazirligi iyünniñ 11-nde Qara deñizge ABD ADQ «Labun» eskadron mina taşıyıcısı kirgende yaptı.
Rusiye er zaman Qara deñiz bölgesinden olmağan memleketlerniñ, hususan NATO azaları olğanlarnıñ gemileriniñ Qara deñizge ziyaretlerine qatiyen qarşı çıqa. Böyle munasebet 2014 senesi Rusiye Qırımnı işğal etken soñ keskin şekilde arttı.
