Odesada martnıñ 23-nde Ukrayina cenübiniñ ekinci regional iftarı keçirildi. Tedbirde Qırımtatar Milliy Meclisiniñ reisi Refat Çubarov ve «Odesa vilâyetiniñ qırımtatarları» cemaat teşkilâtınıñ reisi Fevzi Mamutov iştirak ettiler. Bu aqta Ukrayina prezidentiniñ Qırım Muhtar Cumhuriyetindeki temsilciligi bildirdi.
Tedbirde «Umma» Ukrayina musulmanları diniy idaresiniñ müftisi Murat Suleymanov, Odesa vilâyetiniñ arbiy memuriyet yolbaşçısı Oleg Kiper, Odesa vilâyetiniñ şura reisi Grigoriy Didenko, Türkiyeniñ Odesa baş konsulı Berkan Pahlivan ve prezidentniñ Qırım Muhtar Cumhuriyetindeki daimiy vekiliniñ muavini Denis Çistikov iştirak ettiler.
«11 yıldan berli Qırımnıñ Rusiye Federatsiyası tarafından işğali sebebinden qıyınlıqlarğa oğrağan qırımtatar halqı içün Ramazannıñ qıymeti – meramet, sabır, iman – ayrı bir terenlik qazana. İftar – bu beraber aşamaq degil, bu birdemlik yeridir. Biz bir-birimizge qoltutmaq kerekmiz, duşmanğa izolâtsiya etmege, ayırmağa, qorquzmağa imkân bermemelimiz», – dedi Çistikov.
O, qırımtatarı Leniye Umerovanıñ ve Qırımtatar Milliy Meclisi reisiniñ birinci muavini Nariman Celâlnıñ Rusiye esirliginden qaytuvı aqqında hatırlattı. Onıñ aytqanına köre, er bir ukrayinalınıñ serbestligi oğrunda küreş devam ete.
İftar iştirakçileri qayd etkenine köre, ukrayinalılarnı azatlıq oğrunda küreş, medeniyetler ve dinler arasında ürmet, umumiy kelecekni qorçalağanlar ögünde mesüliyet birleştire.
Martnıñ 21-nde Qırımtatar Milliy Meclisi Ukrayina Tış işler nazirliginen beraber Ukrayina Tış işler nazirliginiñ Diplomatik akademiyasında beraber iftar keçirdiler.
Daa evel bildirilgenine köre, Ukrayina prezidenti Volodımır Zelenskıy martnıñ 13-nde musulman arbiyler, Qırımtatar Milliy Meclisiniñ vekilleri, diplomatlar ve din adamlarınen beraber iftarda iştirak etti.
İftarlar Ramazan ayı devamında aftada bir qaç kere ötkerile, dep bildire Qırımtatar Milliy Meclisi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
