Odesa vilâyetinde Ukrayına ava mudafaa quvetleri tüşürgen 12 Rusiye dronınıñ darbesi neticesinde bir kişi elâk oldı, eki insan yaralandı, dep haber etti Odesa vilâyeti arbiy memuriyetiniñ yolbaşçısı Oleg Kiper.
«Tüşürilgen uçucısızlarnıñ parçaları Odesa şeeriniñ yañı qurulğan ve boş olğan binalardan birine tüşti. Avada urulğan dron şeer civarında yazlıq evlerine tüşti. Yanğın çıqtı, endi söndürildi. Neticede 35 yaşında adam elâk oldı. Eki insan yaralandı: 37 yaşında qadın ve 17 yaşında genç. Bir çoq yaraları bar, orta ağır alda tibbiy müessiselerden birinde bulunalar, kerekli yardım alalar», – dep yazdı o, Telegram kanalında.
Bugün Ukrayına Silâlı Quvetleriniñ Ava küçleri bildirgenine köre, Rusiye ordusı dekabrniñ 27-ne keçer gecesi Shahed darbe uçucısızlarınen Ukrayınağa ücüm etti, umumen 46 Shahed-136/131 qayd etildi. Berilgen malümatqa köre, ava mudafaa quvetleri 32 dronnı yoq etti.
Rusiye arbiyleri, top, toplu ateş raket sistemaları, dron ve raketalarnı qullanıp, Ukrayina şeerlerine muntazam sürette ateş aça. Delil ve şaatlıqlarğa baqmadan, Moskva Ukrayinada vatandaşlarğa qarşı ücüm yapqanını inkâr ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
