Avgustnıñ 3-üne tintüvden soñ Yedi Quyu (Leninskoye) rayonınıñ polis bölügine alınğan Lenur Ablâzimov evine yiberildi.
Bunıñ aqqında “Qırım birdemligi” birleşmesi öz Facebook saifesinde haber etti.
“Lenur Ablâzimov şimdi evinde. Oña ülkeden çıqmacağı aqqında ketmemezlik seneti ve tahqiqat tafsilâtınıñ gizlenmesi aqqında ariza imzalattılar”, - dep yazıla beyanatta.
İşğal etilgen Qırımnıñ Yedi Quyu (Leninskoye) rayonında avgustnıñ 3-ünde rus quvetçileri Yedi Quyu meclis reisi (2016 s.) Lenur Ablâzimovnıñ evinde tintüv keçire.
Küç organları hadimleriniñ bu aqta tefsirleri yoq.
2016 senesi mart ayında rus quvetçileri Lenur Ablâzimovnıñ evine “baquv” keçirmek içün endi kelgen edi.
Rusiye Qırımnı ilhaq etken soñ, mustaqil jurnalistler, cemaat ve qırımtatar Milliy areketiniñ faalcileri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında qabaatlanğan musulmanlarnıñ evlerinde sıq-sıq tintüvler keçirip başladı.
