Rusiye kontrolindeki Qırım baş naziriniñ muavini Yelena Romanovskayanıñ bildirgenine köre, Kezlev ve Yalta observatorları rıqma-rıq tolu. Şunıñ içün, onıñ aytqanına köre, observator rejiminde çalışacaq yarımada şifahaneleri belgilendi.
Bu aqta o, aprelniñ 27-nde yañı koronavirus yuqunçınıñ tarqaluvına qarşı operativ ştab toplaşuvında bildirdi.
«Yalta ve Kezlevdeki observatorlar rıqma-rıq tolu, bugün 400 kişilik «Morskoy», 120 kişilik «Orlenok» şifahaneleri berilecek ve qoşma olaraq Krupskaya şifahanesine baqacaqmız. Er biri Kezlevde yerleşe», – dep bildirdi Romanovskaya.
Yarımadanıñ felâket tibbiyeti ve acele tibbiy yardım merkeziniñ malümatına köre, işğal etilgen Qırımda keçken künü koronavirus şübhesinen hastahanege alınğan insanlarnıñ sayısı rekord oldı.
Aprelniñ 27-nde saba Qırımda bir koronavirus hastası qayd etildi – İslâm Terek rayonınıñ tibbiyet hadimidir.
Al-azırda Qırımda 70 koronavirus hastası bar. 20-si çetelden keldi, 10-u Rusiyeden, 40-ı yerli ola. Aqyarda, soñki malümatqa köre, 31 COVID-19 hastası qayd etildi.
Qırımda ve Aqyarda bir çoq müessise ve teşkilâtnıñ faaliyetini toqtatqan ve vatandaşlarnıñ özüni izolâtsiya etmesini belgilegen yüksek seviyeli azırlıq rejimi aprelniñ 30-na qadar devam ete.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
