Link açıqlığı

AQŞ prezidenti Barak Obama Ukraina prezident saylavlarında ğalip çıqqan Petro Porşenkonıñ Ukraina Rusiye ile eyi munasebetleri içün öz mustaqilligini feda etmemeli aqqında bildirüvine qol tuttı.

Bunı Obama Varşavada Poloniya prezidenti Bronislav Komorovskiy ile muzakerelerinden soñra matbuat konferentsiyada bildirdi, dep bildire Radio Svoboda.

«Yañı saylanğan prezident Petro Poroşenko Rusiye ile eyi munasebetleri onıñ merağında olğanını qayd etti. Bunıñ ile o, Ukraina işbu maqsatlarnıñ amelge keçirüvinde feda olmamaq kerekligini de ayttı, biz onıñ bu fikrine bütünley qol tutamız», – dedi Obama.

Amerika prezidenti mayıs 25 künü keçirilgen nevbetten tış prezident saylavlarını Ukrainada adiselerniñ musbet ilerilevine etilgen «yahşı bir adım» olaraq tanıdı.

Obamanıñ sözlerine köre, ukrainliler öz memleketiniñ kelecegini öz başına belgilemek kerekler.

Hatırlatamız, Qırımtatar halqınnı lideri Mustafa Cemilev salı künü, iyün 3-de, Varşavada «Birdemlik» mukâfatınen taqdirlenecek. Matbuat içün qapalı körüşüvde AQŞ prezidenti Barak Obama ve diger liderler iştirak etecekler.

Mustafa Cemilevniñ Azatlıq Radiosına aytqanına köre, o, Obamağa Rusiyege qarşı cezalarnı amelge keçirmege rica etecek. Sözlerine binayen, işbu cezalar işğal etilgen Qırımnıñ soñki kvadrat metri boşanmağanına qadar işlemeli.

«Birdemlik» mukâfatınıñ para miqdarı – million avro. Cemilevniñ aytqanı kibi, bu paranı o «Qırım inkişaf fondı»ndan masraf etecektir, tahminen 100 biñ avronı Nebesnaya sotnâ qaramanlarınıñ qorantalarına bağışlaycaq.

Tahminlerge köre, mukâfatnı Cemilevge Poloniya tış işler naziri Radoslav Sikorskiy taqdim etecek.

«Birdemlik mukâfatı» ile taqdirlev merasiminde AQŞ devlet kâtibi John Kerry, Polniya, AQŞ, Frenkistan prezidentleri, Ukrainanıñ yañı saylağan prezidenti Petro Poroşenko ve qırımtatar milliy Meclis reisi Refat Çubarov ve Mustafa Cemilevniñ ömür arqadaşı Safinar bulunacaqlar.
XS
SM
MD
LG