Ukrayina prezidenti Volodımır Zelenskıy soñki matbuat konferentsiyası vaqtında Kremlniñ Qırım mabüsleriniñ, şu cümleden Qırım.Aqiqatnıñ frilanseri Vladislav Yesipenkonıñ azat etilmesi ile bağlı vaziyet "qıyın" qala, dep bildirdi. Bu aqta o, Azatlıq Radiosınıñ jurnalisti Roksolana Bıçaynıñ sualine cevap berip ayttı.
''Qırımda yaşağanlarğa kelgende vaziyet qıyın. Halqara teşkilâtlarğa minnetdarlıq bildirmek içün iç bir şey yoq. Olar bir şey yapıp olamadılar. Erdoğan ile bu mevzuda çoq çalıştım. Prezident Erdoğan Qırım territoriyasında bulunğan esirlerniñ episi içün neticelerni köstermedi'', - dep qayd etti Zelenskıy.
Bundan evel "Qırım platforması" sammitinde iştirak etken ZMINA insan aqları merkezi ve Qırım uquq qoruyıcı gruppasınıñ uquq qoruyıcıları, ilhaq etilgen Qırımda vatandaş şahısları, şu cümleden siyasiy mabüsler de, arbiy esirlerge nisbeten deñişimge daa az rastkele, dep qayd etken ediler.
Ukrayina Prezidentiniñ Qırım Muhtar Cumhuriyetindeki Daimiy Temsilcisi Tamila Taşeva, müessiseniñ 2023 senesindeki işi neticelerine bağışlanğan brifing vaqtında, 2023 senesi dekabr ayınıñ soñuna qadar Qırım sakinlerine nisbeten siyasiy sebeplerden azatlıqtan marum etüvniñ 191 adisesi qayd etilgenini bildirdi, olardan 123 - qırımtatardır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
