Amnesty International halqara uquq qoruyıcı teşkilât, qırımtatar uquq qoruyıcısı, Yalta "Hizb ut-Tahrir davası"nıñ iştirakçisi Emir-Üsein Kukuğa qol tutuv petitsiyasını imzalamağa davet ete.
Teşkilât saytı bildirgeni kibi, "Kuku, işğal etilgen Qırımda başqalarnıñ aq-uquqlarını qorçalağanı içün, üç yıldan çoq türmeden, apayı ve eki balasından uzaqta keçirdi".
"Oña qarşı qabaatlav temelsiz ve faalligi içün oña 25 yılğa qadar apis müddeti berile bile", - denile beyanatta.
Amnesty International, imzalanğan ariza Rusiye Baş Prokurorına yollanacağına ayrıca diqqat ayıra.
Qırım uquq qoruyıcısı Emir-Usein Kuku Yaltada 2016 senesi tutulğan edi. Rusiye tahqiqatı onı Rusiyede yasaqlanğan «Hizb ut-Tahrir» islâm siyasiy teşkilâtı ile alâqaları bar olğanında qabaatladı. Rusiye arbiy mahkemesi Yaltadaki «Hizb ut-Tahrir davasını» Aqmescitte çıqış oturışuvlarında baqqan edi, soñra apiske alınğan qırımlılar, şu cümleden Kuku, Rostov-na-Donuğa avuştırıldı. Al-azırda Kuku Rostov-na-Donu SİZOsında apiste buluna.
Aprel 4-ünde Rostov-na-Donu şeeriniñ Şimaliy Kavkaz bölgesiniñ arbiy mahkemesi, "Yalta Hizb-ut Tahrir davası"nı ekinci sefer baqıp başladı.
Ukraina Tış İşleri Nazirligi, "Yalta Hizb ut-Tahrir davası"nıñ iştirakçilerini azat etmege Rusiyeden talap ete.
