Link açıqlığı

Nuland: AQŞ ve AB Rusiyeniñ Ukrainada saylavlarnı bozmaq niyetini köz ögüne alıp, areketler planını muzakere eteler


Rusiye yapqanları içün cevap berdi, lâkin Ukrainağa qarşı istilâ siyasetinden vazgeçmese, daa beter ceza alacaq. Bunı Bratislavda global havfsızlıq Forumı çerçivesinde keçirilgen matbuat konferentsiyasında AQŞ devlet kâtibiniñ muavini Viktoria Nuland bildirdi, dep haber ete Azatlıq Radiosı.

Nulandnıñ aytqanına köre, ileride Rusiye Ukrainadaki vaziyetni bozacaq olsa, AQŞ ve AB areketler planını azırlaylar.

«Diger taraftan bizler vaziyetni al etüv, diplomatiya ve dialog içün qapularnı açıq qaldıramız. Ukraina ve Rusiye Jenevada körüştiler. Yazıq ki, añlaşmalarğa riayet etilmedi», - dedi Nuland .

O, qayd etti ki, AQŞ Ukrainada OSCE imayesi altında detsentralizatsiya mevzusında keçirilecek tögerek masağa qol tuta. «Lâkin bundan daa da aktual mesele mayıs 25-ne keçirilmesi belgilengen saylavlar ola», - dep tüşüne Nuland.

Devlet kâtibiniñ yardımcısı bildirdi ki, AB ve AQŞ Rusiyege qarşı cezalar kirsetilmesinen bağlı areketler boyunca añlaşalar.

«AQŞ cezalar aqqında qarar alsa, AB de aynı qarar ala. Bizim cezalar cedvelleri biri-birinen sıq-sıq muzakere etilgen. Bizler, Ukrainada saylavlar bozulsa, ne yapacağımıznı da tüşünemiz», - dep ayttı Nuland.

O, qayd etti ki, AQŞ ve AB tarih, coğrafiya ve munasebetlerden sebep bundan evel şekillengen farqlı mevamları bar, lâkin bu da AQŞ ve AB arasında bir mevam olmasınıñ müimligini ifadeley.

Viktoria Nuland Estoniyanı ziyaret etip, Rusiye rublesi dollarğa nisbeten 20%-ğa ücüzlaşqanını ayttı. Onıñ içün Halqara para fondu Rusiye «retsessiyağa yaqınlaşqanını» bildire bile.
XS
SM
MD
LG