Noyabrniñ 23-nde tutulğan qırımtatar faalleri muvaqqat tutuv izolâtorında qalacaqlar. Böyle qararnı Rusiyeniñ nezaretinde olğan Qırımnıñ Yuqarı mahkemesi çıqardı, dep haber etti cemaat imayecisi Ayder Suleymanov.
Mahkeme Suleymanovnıñ bütün muracaatlarını redi etip, noyabrniñ 24-nde Aqmescit Merkeziy rayon mahkemesiniñ qararını quvette qaldırdı. Bunı «Qırım birdemligi» cemaat birleşmesi haber etti.
«Bundan ğayrı imayeci mahkemede qabaatlanğan yaşlı Murtaza Fahriyevnen olıp keçken vaqia aqqında aytıp berdi. Merkeziy rayon mahkemesinde, o, reislik yapqan qadınıñ aytqanlarını eşitmegen, çünki yaramay eşite. Bunıñ içün Suleymanov oña qadınıñ aytqanlarını añlatqan. Qadı ise Fahriyevniñ ve Suleymanovnıñ üstüne qıçırğan, çünki o zaman advokat daa imayeci statusında degil edi ve bundan sebep iç bir şey añlatmaq aqqı da yoq edi. O zaman olar qadını red etkenler, amma bu qabul etilmegen. Qırımnıñ Yuqarı mahkemesi bu vaqianı köz ögüne alğan, amma buña ve yaşına baqmadan Fahriyevni Muvaqqat tutuv izolâtorında qaldırğan», – dep yazıla bildirmede.
Suleymanovnıñ qayd etkenine köre, mudafaa taarfı mahkemeniñ bu qararını temyiz etmek niyetindedir.
Aqmescitte noyabrniñ 23-nde aqşam Rusiye quvetçileri azatlıqqa çıqqan Edem Semedlâyevni qarşılamaq içün vaqtınca tutuv izolâtorınıñ binasına kelgen faallerni tuttı. 31 insan tutuldı, aralarında 10 qadın, jurnalistler ve matbuat kartları olğan «Qırım birdemliginiñ» mühbirleri bar. Tutulğanlar üç polis bölügine alıp ketirildi.
Aqmescitniñ vaqtınca tutuv izolâtorınıñ binası ögünde tutulğan 15-ten çoq qırımtatar faali Rusiye kodeksiniñ memuriy maddesine istinaden apiske alındı.
Qırım Muhtar Cumhuriyeti ve Aqyar prokuraturası qırımtatar faalleriniñ tutuluvı sebebinden cinaiy tahqiqat başlattı.
Ukraina akimiyeti, aq qorçalayıcılar, çetel elçihaneleri ve missiyaları Rusiyeni Qırımda böyle taqiplerni toqtatmasına çağıra. Rusiye akimiyeti böyle çağıruvlarnı körmemezlikke ura.
