Qırımnıñ Saq rayonında iyulniñ 1-nde Novofedorovka rayonında 10 gektarda yanğın çıqtı, dep bildire Rusiye kütleviy haber vastaları Qırımdaki Rusiye Fevqulâde vaziyetler hızmetiniñ idaresine esaslanıp.
Berilgen malümatqa köre, ateşni 65 insan söndüre, 19 dane tehnika celp etildi. Bundan bir qaç saat ögüne 1 gektarlıq meydanda yanğın aqqında haber etildi.
Yanğın sebepleri aytılmay. Bundan evel iyülniñ 1-ne keçer gecesi Qırımda atış ve patlav sesleri eşitildi, şu cümleden Saq rayonında, dep haber etildi. Ukrayina telükesizlik hızmeti işğal etilgen Qırımda Novofedorovka yanındaki "Saki" Rusiye arbiy uçaq alanında darbe endirgenini bildirdi, amma tam ne vaqıt ücüm etilgenini aydınlatmadı. NASA Firms hızmetiniñ uydu çekimlerinde uçaq alanı yanında körüngen büyük yanğın qayd etile.
İyün ayında Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.