«Böyle gemiler boş qalmay. Ve o vaqıt limanda olsa bile, ekipajnıñ büyük qısmı gemide olmaq kerek edi. Ekipajı ise tahminen 80 kişilik. Bu gemilerniñ çeşitini köz ögüne alsaq, anda başqa insanlarnıñ olması da mümkün edi, şunıñ içün qurbansız olmaz – kerçek budır», – dep ayttı Pletençuk.
Onıñ bildirgenine köre, şimdi malümat teşkerile ve «OSINT ölüm haberlerini körecegini biraz beklemek kerek», malümat ise illâ olur.
ASTRA Rusiye Telegram kanalı menbalarına esaslanıp yazğanına köre, «Novoçerkasskta» 77 deñizci bar edi: 33-ü ğayıp olğan sayıla, 19-ı yaralandı.
Ukrayına Ava quvetleri bildirgenine köre, gece saat eki buçuqlarda taktik aviatsiya Kefe rayonında Rusiye Qara deñiz flotunıñ «Novoçerkassk» büyük desant gemisine qanatlı raketalarnen ücüm etti.
Ukrayına Ava quvetleriniñ komandanı Mıkolay Oleşçuk nişan muvafaqiyetnen yoq etildi, dep bildirdi.
Ukrayına Ava quvetleriniñ spikeri Yuriy İgnatnıñ aytqanına köre, Ukrayına aviatsiyası qanatlı raketalarnen ücüm etken «Novoçerkassk» bütünley yandı ve liman infrastrukturası da zarar körgendir.
Rusiye Mudafaa nazirligi Ukrayına Silâlı quvetleriniñ Kefede «Novoçerkassk» desant gemisine darbe endirgenini tasdıqladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
