Ukraina prezidenti Volodımır Zelenskıy, Parijde dekabr 9-ında keçken "Normandiya formatı"ndaki körüşüvden soñ matbuat konferentsiyasında çıqışta bulunğanda, Ukraina ve onıñ halqı içün bozulmaz printsiplerni belgiledi. Hususan, o, Donbass ve Qırım Ukrainanıñ bir parçası olğanını qayd etti.
"Men, Ukraina prezidenti olaraq, bozmaycağım ve Ukraina halqı bozulacağına razı olmaycaq printsiplerni belgilemege isteyim. Birinciden, federalleştirüvniñ imkânsızlığı. Ukraina - unitar bir devlettir. Bundan ğayrı, ülkeniñ şarqındaki vaziyetniñ devlet sıñırlarına almaştıruvnen bağlı kompromisslerniñ imkânsızlığı. Epimiz bilemiz ki, Donbass da, Qırım da - bu Ukraina", - dedi Zelenskıy.
O, bazı müim meselerni körüşüv vaqtında çezip olamağanlarını qayd etti, amma qaysı bir sualler olğanını aydınlatmadı.
Daa evel Ukraina prezidenti Volodımır Zelenskıy, «Normand» muzakereleriniñ iştirakçi memleketleri Ukraina ve Rusiyede tutulğan şahıslarnıñ «er kesni er keske» şeklinde 2019 senesiniñ soñuna qadar azat etilüvine yardım etecek, dep bildirdi.
Ukraina prezidenti Frenkistan prezidenti Emmanuel Macron, Almaniya kantsleri Angela Merkel ve Rusiye prezidenti Vladimir Putin ile eki taraflı körüşüvler keçirdi.
