Ukraina prezidenti Volodımır Zelenskıy, normand formatında körüşüvniñ neticelerine ukrainalı siyasiy mabüsler azat etilip etilmegenine köre qıymet kesecek, dep ayttı. Bu aqta o, sentâbrniñ 10-nda YES Brainstorming forumında bildirdi, dep haber ete Azatlıq Radiosı.
«Maña netice kerek. Neticege insanlarnıñ sayısına köre baqam… Normand körüşüvi olmalı – olarnen (Rusiyenen – muar.) bağlı», – dedi prezident.
Onıñ qayd etkenine köre, Kyiv normand dördü körüşüviniñ keçirilüvi içün çalışa, ve körüşüv olsa, «insanlarnıñ bir qısmı qaytacaq».
«Men «er kes» deñişimine inanmayım, añlaşqanlarımız bir vaqıt bütünley yerine ketirilmey, Rusiye bunı yapmay. Nasıl olsa da, körüşüv olacaq, bir neticesi olacaq. Neticesi – 100 insan, 50, eki kişi, ne qadar olsa olsun», – dep qayd etti Zelenskıy.
Ukraina Tış işler naziri Dmıtro Kuleba şimdi normand formatı tış işler nazirleriniñ körüşüv künü belgilenmekte, dep bildirdi.
İyün ayında Ukraina ombudsmanı Lüdmila Denisova 405 Ukraina vatandaşı Rusiyede ve işğali altındaki Ukraina topraqlarında apiste tutula, dep bildirgen edi. Onıñ malümatına köre, Rusiye 93 qırımtatarını siyasiy sebeplerden taqip ete.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
