Fevralniñ 23-nde Qırımtatar halqınıñ milliy qaramanı Noman Çelebicihan añıla. Bu aqta Qırımtatar Milliy Meclisiniñ reisi Refat Çubarov Facebookta yazdı.
«104 yıl evelsi, 1918 senesi fevralniñ 23-nde, Aqyarda bölşevikler tarafından kontrol etilgen Qara deñiz Flotunıñ matrosları Noman Çelebicihannı – Qırım Halq Cumhuriyeti ükümetiniñ birinci reisi, I Qırımtatar Milliy Qurultayınıñ teşkilâtçılarından biri, Qırım, Beyazrusiye, Litvaniya ve Poloniyanıñ müftisi, qırımtatar milliy gimni olğan «Ant etkenmen» şiiriniñ müellifi – çekiştirilip öldürildi. Moskvanıñ emrinen yapılğan bu deşetli öldirüvniñ maqsadı qırımtatar halqınıñ o vaqıt Qırımda yaşağan er kesni birleştirecek devletni quruv ğayretlerini bastırmaq edi», – dep yazdı Çubarov.
O, aynı künde çeçen ve inğuş halqları genotsidiniñ qurbanları añıla, dep qayd etti.
«78 yıl evelsi, 1944 senesi fevralniñ 23-nde, Sovetler Birliginiñ NKVD askerleri inğuş ve çeçen halqlarını tuvğan topraqlarından sürgün etip başladı, 500 biñden 650 biñge qadar çeçen ve inğuş Vatanından quvuldı. Eki aydan soñ deşetli facia Qırım toprağına da keldi. 1944 senesi mayısnıñ 18-nde qırımtatar halqı Vatanından sürgün etildi. Qırımtatar Milliy Meclisi adından ve şahsen men halqınıñ tarihını unutmağan, qaramanlarını ve sovetler rejiminiñ millionlarnen qabaatsız qurbanını añğan, qomşularınıñ facialarına qayğıdaş olğan er kesnen birdemligini bildirem», – dep qayd etti Meclis reisi.
Çarşenbe künü, fevralniñ 23-nde, Kyivdeki «Qırım evinde» Noman Çelebicihanğa bağışlanğan edebiyat aqşamı keçirilecek. Tedbir saat 19:00-da başlanacaq.
