Rusiye Federatsiyası kontrolindeki Herson vilâyetiniñ Geniçesk rayon mahkemesi Qırım sakinini “Noman Çelebicihan qırımtatar göñülli batalyonında” iştirak etkeninde qabaatlap, 10 yılğa azatlıqtan marum etmege üküm etti. Bu aqta Rusiye kütleviy haber vastaları Qırım ve Aqyardaki Rusiye Federatsiyası FSB idaresiniñ malümatına esaslanıp haber ete.
Berilgen malümatqa köre, erkek 2016 senesi fevral ayında batalyonğa qoşulıp, “Rusiye Federatsiyasınıñ menfaatlarına zıt kelgen faaliyette faal iştirak etti”. Rusiye uquq qoruyıcılarınıñ malümatını cenk vaziyetinde teşkermek imkânsız ola.
Erkekniñ adı ve soyadı aytılmay, onıñ izaatları yoq.
Rusiye FSBsi “Noman Çelebicihan qırımtatar göñülli batalyonını” 2022 senesi “terror teşkilâtları” cedveline kirsetti.
2014 senesinden başlap Qırımtatar resurs merkezi “Noman Çelebicihan batalyonında” iştirak etüvde qabaatlanğan 66 kişiniñ tutulğanını qayd etti: 2022 senesi fevralniñ 24-nden soñ 19 – işğal etilgen Qırımda ve 47 – işğal etilgen Herson vilâyetinde.
Noman Çelebicihan qırımtatar batalyonı
Noman Çelebicihan qırımtatar batalyonı – 2016 senesiniñ başında esas Ukrayınanıñ işğal etilgen Qırımnen memuriy sıñırında qurulğan göñülli qırımtatar birleşmesidir. Batalyonğa qırımtatar siyasetçi ve cemaat erbabı, Qırım Halq Cumhuriyeti ükümetiniñ birinci Reisi, Qırımnıñ I Qurultay teşkilâtçısı, Litvaniya, Poloniya, Beyazrusiye müftisi Noman Çelebicihannıñ adı berildi.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete. Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi. «Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
İyünniñ 1-nde Rusiye Yuqarı mahkemesi «Noman Çelebicihan qırımtatar göñülli batalyonını» Rusiyede yasaqlap, «terror» teşkilâtı dep tanıdı.
