«Amerika sesi» haber etkenine köre, Norveç Nobel komiteti 2021 Nobel sulh mukâfatı içün 329 namzet alğan.
Namzetlerniñ sayısına köre, bu yıl tarihta üçünci yerde olğanı qayd etile. Rekord qırğan sayı 2016 senesi edi 376 namzet.
Namzetler arasında bu sene 234 kişi ve 95 teşkilât.
«Bu, Nobel sulh mukâfatına olğan büyük halqara merağını akis ete. Daa bu, dünyada bir sıra al etilmegen çatışmalarnıñ, cenklerniñ ve insan aqları meseleleriniñ mevcut olğanını akis ete», – dedi Norveç Nobel komitetiniñ kâtibi Olav Nyelstad.
Komitet namzetlerniñ cedvelini açıqlamay. Amm kim olarnı namzet etip köstergenini bildire.
Belli olğan namzetler arasında Belarusiye muhalefet fırqasınıñ lideri Svetlana Tihanovskaya ve qabarcılıqqa qarşı küreşken rusiyeli Aleksey Navalnıy.
Bundan ğayrı ABD sabıq prezidenti Donald Tramp, onıñ kiyevi Cared Küşner ve onıñ muavini Avi Berkovits namzetler arasında.
2021 laureatları oktâbr ayında ilân etilecek.
2020 senesi Nobel sulh mukâfatınıñ laureatı Bütün dünya azıq programması olğan edi.
