Aprelniñ 1-nde Ukrainanıñ vaqtınca işğal etilgen topraqlarınıñ reintegratsiyası ve içtimaiy siyaseti meselelerinden ükümet komitetiniñ oturışında Qırımtatar tiliniñ inkişafı içün kontseptsiya leyhası desteklendi. Bunı Reintegratsiya nazirligi haber ete.
Bu kontseptsiya leyhasını Reintegratsiya nazirligi Qırımtatar Milliy Meclisi, ihtisaslı ilmiy ve tasil müessiseler, ükümetke bağlı olmağan teşkilâtlar ve mütehassıslar (olarnıñ arasında vaqtınca işğal etilgen Qırım ve Aqyar şeerinden olğanlar da) ile beraberlikte azırladı.
Nazirlik, kontseptsiya Ukraina prezidentiniñ «Vaqtınca işğal etilgen Qırım Muhtar Cumhuriyeti ve Aqyar şeeriniñ işğalden boşatıluvı ve reintegratsiyası içün yapılğan ayrı tedbirler aqqında» fermanınıñ yerine ketirilmesi içün birinci nevbette turğan çare kibi azırlanğanını bildirdi.
Nazirlikte qayd etkenlerine köre, kontseptsiya 2022-2032 yıllar içün Qırımtatar tiliniñ inkişaf strategiyasınıñ azırlanmasına dair esas yanaşmalarnı ve esas yönelişlerni belgiley. O 2021 senesi avgustnıñ 2-nde Ukraina Nazirler kabinetiniñ baqıluvına taqdim etilmek kerek.
«Nevbetteki adım – kontseptsiya leyhasınıñ ükümet tarafında baqılması. Tasdıqlanğan soñ ise biz 2022-2032 yıllar içün Qırımtatar tiliniñ inkaşafı strategiyası ve onıñ yerine ketirilmesine dair tedbirler planı üzerinde çalışıp başlaymız. Bu, devlet akimiyet organlarınıñ, yerli özidare organlarınıñ, vatandaş cemiyeti institutlarınıñ, alimler ve muallimlerniñ faaliyetiniñ sinegriyasını temin etecek yüksek keyfiyetli vesiqanı vaqtında azırlanmasına imkân berecek», – dep qayd etti Ukraina Reintegratsiya naziriniñ birinci muavini Rostislav Zamlinskiy.
O, kontseptsiya çerçivesinde bir sıra tedbirler Ukraina tamır halqlarından biriniñ tili olaraq sayılğan qırımtatar tiliniñ işlemesi içün «qanun çıqarıcı, institutsional, maliyeviy, malümat ve diger destekler» yapılacağını ayttı.
Halqnıñ birleşmesi: Aqmescitte qırımtatar tilinden online imlâ keçirildi (fotoresimler)
Yanvarniñ 27-nde Ukrainanıñ işğal etilgen topraqlarnıñ reintegratsiya meseleleri nazirligi «cemaatçılıq ile elektron mesleat» keçirmek içün qırımtatar tilini inkişaf ve populârlaştıruv kontseptsiyasınıñ leyhasını aydınlattı.
Ukraina reintegratsiya nazirligi Google LLC korporatsiyasına muracaat etip, qırımtatar tilini Google Translate servisine kirsetmege rica etti. Nazirlik Duolingoşirketine – çetel tillerini ögrenüv platformasına muracaat etip, olarnıñ servisi esasında qırımtatar tili kursını başlatmağa teklif etti.
