Ukraina prezidenti Petro Poroşenko qırımtatar halqınıñ lideri, Ukraina halq deputatı Mustafa Cemilevni Azatlıq ordeni ile mükâfatladı.
Buña münasip 241/2018 nomeralı emir Ukraina prezidentiniñ saytında ilân etildi.
Vesiqada aytılğanına köre, Azatlıq ordeni «devlet qurulması ve Ukrainanıñ içtimaiy-iqtisadiy ve ilmiy-tehnikiy inkişafına qoşulğan büyük bir isse, emekteki emiyetli yararlıqlar ve yüksek professionalizm içün berile.
Açıq menbalarda Mustafa Cemilevniñ mükâfatlavı ile bağlı izaatları yoq.
Mevzuğa dair: «Bu insannı saylap alğan yolundan burulmağa mecbur ete bilecek küç yoq»
Mustafa Cemilev – qırımtatarlarnıñ milliy lideri, SSCB ve Ukraina devirleriniñ siyaset ve cemiyet erbabı. Qırımtatar milliy areketiniñ rehberlerinden biri, aq-uquq qorçalayıcısı, dissidentlik areketiniñ iştirakçisi, siyasiy mabüs, Ukraina halq deputatı ve 2014 senesi ağustos 20-den başlap – Ukraina prezidentiniñ qırımtatar halqınıñ işleri boyunca vekili.
2014 senesinde Qırım Rusiye tarafından ilhaq etilgen soñ Rusiye ükümeti Cemilevge Rusiye ve ilhaq etilgen Qırımğa kirmesini yasaq etti.