“Ukrain diversantları işi"niñ iştirakçisi Vladimir Dudkanıñ alı kene ağırlaştı, - dep Qırım.Aqiqatqa haber etti onñ oğlu İlya Dudka.
“Bu mevzu biz içün eñ müşkül. Babamnıñ erkeklerge ait olğan hastalığı ilerley. Bu mesele aqqında atta laf yürsetmek qolaysız. SİZOğa ilâc yollanılmasınen ise daima qıyınlıqlar çıqa. Buña baqmadan, sertifikatnı alıp oldım ve yaqın künlerde tedaviylev içün bütün kereklerini yibermege tırışarım”, - dedi Dudka.
İlya Dudkanıñ aytqanına köre, babasınıñ mahkeme işinde müsbet neticelerini beklemey.
“Yazıq ki, o, bu madde boyunca Qırımda mahküm etilgen, yekâne adam degil. Ve, misal içün, Yevgeniy Panovnıñ ceza müddetini biz endi bilemiz. Bellesem, babama tahminen o qadar da verilir. Amma, elbette ki, işniñ hayırlı tarafına çevirilecegine inanmaq isteymiz”, - dep qoştı Dudka.
İyülniñ 31-inde Kreml nezareti altındaki Aqyar şeer mahkemesi, Qırımda diversiya azırlağanlarında qabaatlanğan, Vladimir Dudka ve Aleksey Bessarabovnıñ tevqifini 6 ayğa uzattı.
2016 senesi noyabrniñ 9-da Aqyarda «Ukraina Mudafaa nazirligi baş istihbarat idaresiniñ diversion-terroristik gruppasınıñ azaları» Dmitriy Ştıblikov, Aleksey Bessarabov ve Vladimir Dudka yaqalanğan ediler.
2017 senesi noyabrniñ 16-sında Aqyar şeer mahkemesi Ştıblikovnı 5 yıllıq şiddetli rejim koloniyasına ve 200 biñ rublelik (95 biñ grivna) para cezasına mahküm etti.
Ukraina havfsızlıq hızmeti Qırımda tutulğan Ukraina vatandaşları SBU hadimleri olmağanını bildirdi.
