Qarasuvbazar rayonınıñ Qışlav köyünde keçirilgen tintüvlerden soñ tutulğanlar evge yiberildi, dep haber etti “Qırım birdemligi” birleşmesi.
Qırım.Aqıqat muhbiriniñ bildirgenine köre, eki tutulğan yerli sakin -16 yaşlı Eskender Abduveliyev ve 38 yaşındaki Seytumer Asanov.
Qışlavnıñ sakinleri bir qaç saat devamında olarnıñ ne yerde bulunğanlarını bilmege tırışa edi. Az-azırda olar evlerinde.
İyülniñ 26-sına Qarasuvbazar rayonınıñ Qışlav köyünde çağına yetmegen dört gençniñ evinde kütleviy tintüvler keçirildi. Hususan, Mustafa Köki, Ümer Abduveliyev, Rizvan Seythalilov, Seytumer Asanovnıñ evlerinde teftiş etildi. Daa bir tintüv Sudaq rayonınıñ Osmançıq köyünde Aziz-Muhammed Aliyevniñ evinde keçirildi. “Qırım birdemligi” teşkilâtı bildirgenine köre, Aziz-Muhammed evinde qaldı. Tehnika tutıp alınmadı, sadece körülme teftiş keçirildi.
Keççe eki insannı rusiyeli İç İşleri rayon bölügine (ROVD) alıp ketkenleri belli oldı.
Bu beş genç Qışlav Köy Şurasından Rusiye bayrağını alıp taşlap, yaqqanlarında qabaatlana. Adise 2018 senesi iyünniñ soñunda yüz bergen edi. Bu sebepten Rusiye CK (Rusiye devlet timsallerini aqaretlev) 329 maddesine köre cinayet davası açıldı. Olıp keçken vaqialardan soñ bütün şübelilerden açıqlama mektüpleri alındı.
Qırım işğalinden soñ yarımadanıñ rusiyeli akimiyeti mustaqil jurnalistler, faaller, Milliy areketniñ iştirakçileri, Meclis azaları ve Rusiyede yasaq etilgen “Hizb ut-Tahrir” ile bağda vesveselengen insanlarnıñ evlerinde kütleviy tintüv keçirmekni adet etti.
