İyülniñ 26-sına Qıslav köyünde keçirilgen tintüvler devamında, gençlerden birisiniñ evinde gilza tapılğanını rusiyeli küç idaresiniñ hadimleri iddia ete. Bu aqta Rusiyedeki Azatlıq Radiosınıñ muhbiri haber ete.
Ondan da ğayrı, eski pıştav qapı tapılğanını bildireler.
Daa evel haber etkenimiz kibi, iyülniñ 26-sına Qarasuvbazar rayonınıñ Qışlav köyünde çağına yetmegen dört gençniñ evinde kütleviy tintüvler keçirildi. Hususan, Mustafa Köki, Ümer Abduveliyev, Rizvan Seythalilov, Seytumer Asanovnıñ evlerinde teftiş etildi. Daa bir tintüv Sudaq rayonınıñ Osmançıq köyünde Aziz-Muhammed Aliyevniñ evinde keçirildi. “Qırım birdemligi” teşkilâtı bildirgenine köre, Aziz-Muhammed evinde qaldı. Tehnika tutıp alınmadı, sadece körülme teftiş keçirildi.
Soñra belli oldı ki, eki ösmürni – Eskender Abduveliyev ve Seytumer Asanovnı - rusiyeli İç İşleri rayon (ROVD) bölügine alıp kettiler.
Bu beş genç Qışlav Köy Şurasından Rusiye bayrağını alıp taşlap, yaqqanlarında qabaatlana. Adise 2018 senesi iyünniñ soñunda yüz bergen edi. Bu sebepten Rusiye CK (Rusiye devlet timsallerini aqaretlev) 329 maddesine köre cinayet davası açıldı. Olıp keçken vaqialardan soñ bütün şübelilerden açıqlama mektüpleri alındı.
Qırım işğalinden soñ yarımadanıñ rusiyeli akimiyeti mustaqil jurnalistler, faaller, Milliy areketniñ iştirakçileri, Meclis azaları ve Rusiyede yasaq etilgen “Hizb ut-Tahrir” ile bağda vesveselengen insanlarnıñ evlerinde kütleviy tintüv keçirmekni adet etti.
