Almaniya kantsleri Angela Merkel, Almaniyağa müdafaa masraflarını arttırmaq kerek olğanınıñ añlatılması içün mahsus video blogda Qırımnıñ ilhaqı ile Ukrainanıñ şarqındaki cenkni, Almaniya tarafından mudafaa masraflarınıñ arttırılması içün sebeptir, dedi. Bunı Deutsche Welle bildirdi.
Merkel: «NATOğa meydan oqumaları soñki yıllarda qatiyen deñişti. Rusiye tarafından Qırımnıñ ilhaqından ve Moskva tarafından Ukrainanıñ şarqında separatistlerge qol tutuvından soñ NATO içün Alyansnıñ müdafaasında diqqatını toplamaq müim. Bunıñ içün belli bir çareler körmek, misal içün, Merkeziy ve Şarqiy Avropada mevcütligini arttırmaq kerek», – dep qayd etti.
Siyasetçi, NATOnıñ «bizni qorçalamaq azır olğanını» köstermek keregine baqmadan, aynı zamanda Rusiye ile münasebetlerniñ eyileşmesi içün çalışmaq lâzim, dep qayd etti.
Alman siyasetçisi: «Elbette, biz Rusiye ile mesüliyetli münasebetlerimizniñ olmasını isteymiz. Bu sebepten biz, Rusiye-NATO Şurasındaki müzakerelerniñ yapılmasını devam ettirecekmiz», – dep ayrıca qayd etti.
Merkel nutqunda Almaniyanıñ, müdafaa masraflarını umumiy içki mahsulatnıñ (UİM) 2%-ine (şimdi olar 1,24%-ni teşkil eteler) qadar arttırmaq mecburiyetini tasdiqladı. Kantsler, müdafaa masraflarınıñ arttırılmasına umumen menfiy münasebet köstergen Alman toplulığına müracaat etip, müdafaa bücetiniñ arttırılması silâlar qoşusı degil de, arbiylerge, öglerinde qoyulğan vazifelerniñ eda etmeleri içün daa yahşı silâlar berilmesi olğanını qayd etti.
Daa evel, Almaniyada siyasetçiler ve cemiyet erbaplarınıñ, iyül 16-da Helsinkide keçirilmesi planlaştırılğan AQŞ ve Rusiye prezidentleriniñ körüşüvi münasebeti ile rahatsız olğanları bildirilgen edi.
Tramp bundan evel, fikrince, yetersiz olğan NATOğa paralar ayıruv seviyeleri içün NATOğa kirgen devletlerni ve şu cümleden Almaniyanı defalarca tenqit etti. İyül 6-da Montana ştatında çıqışta bulunğanda o, Almaniya kantsleri Angela Merkel AQŞtan Avropanıñ qorçalamasını istey, amma aynı zamanda özü Rusiye ile gaz boyunca añlaşmalar yapa, dedi. Ondan ğayrı Tramp, Putin ile körüşüv kibi vaqialarğa bütün ömür azırlanğanını ve Rusiye lideriniñ onı «yeñip olamaycağından» emin olğanını söyledi.
