İyün 8-de OSCE Parlament assambleyasında Ukraina eyeti AQŞ eyetiniñ azaları ile körüşüv keçirdi. Onda ilhaq etilgen Qırımnıñ meseleleri müzakere etildi. Bunı Ukraina halq deputatı, Qırımtatar Milliy Meclisiniñ reisi Refat Çubarov özüniñ Facebookında bildirdi.
Onıñ sözlerine köre, körüşüv OSCE komitetleriniñ oturışuvları arasındaki teneffüste keçirildi.
Refat Çubarov: «Qırım ve siyasiy mabüsler meseleleri esas edi. Qısqadan ve tafsilâtsız olsa, noqtai-nazarımız şu: Qırımnıñ uzun sürgen işğali Rusiyeniñ Qırımdan qırımtatar halqını ve etnik ukrainlerni tamamile sıqıştırıp çıqaruv ve aynı zamanda ruslarnı ketirip yerleştirüv boyunca maqsatlarına hizmet ete. Putin halqara uquq normalarına qatiyen riayet etmese, onıñnen er angi dialog – oña bundan soñki cinayetleriniñ işlemesine özgün bir indulgentsiya berilmesidir», – dep bildirdi.
İlhaqtan soñ Qırımdaki faktik Rusiye ukümeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübheli sayılğan Qırım musulmanlarınıñ evlerinde muntazam surette kütleviy tintüvler keçire.
