Almaniyada siyasetçiler ve cemiyet erbapları, iyül 16-da Helsinkide keçirilmesi planlaştırılğan AQŞ ve Rusiye prezidentleriniñ körüşüvi münasebeti ile endişelerini bildireler.
Alman KHVleri, kantsler Angela Merkelniñ üküm sürgen koalitsiyasınıñ trans-Atlantika siyaseti boyunca koordinatorı Peter Bayerniñ sözlerini naqil eteler. O, Vladimir Putin ile Donald Trampnıñ Finlândiyanıñ paytahtında irişe bilecek añlaşmalarına dair NATOda olğan qorqular aqqında bildirdi.
Bayerniñ aytqanına köre, Trampnıñ Şimaliy Koreyanıñ lideri Kim Çen In ile yaqında keçken körüşüvi – AQŞ prezidentiniñ Rusiye liderine «özüni aldatmağa» imkân bere bilecegine dair endişeler içün qoşumça sebeptir.
«Kim şimdilik yalıñız vaad ete, Tramp ise körüşüv keçirilmesi adisesine endi muvafaqiyet dey», – dep hatırlata o.
Muhalif Azat demokratik fırqanıñ lideri Kristian Lindner de AQŞ prezidentine işanmağanını bildirdi. Telükesizlik boyunca Münhen konferentsiyasınıñ reisi Volfgang İşinger ise, Tramp ile Putinniñ körüşüvi NATOnıñ iyül 11-12 tarihlarındaki sammitinden soñ keçecegini ve bu sammitte AQŞ ve olarnıñ müttefiqleri arasındaki zıddiyetler keskinleşe bilecegini hatırlattı.
Tramp bundan evel, fikrince, yetersiz olğan NATOğa paralar ayıruv seviyeleri içün NATOğa kirgen devletlerni ve şu cümleden Almaniyanı defalarca tenqit etti. İyül 6-da Montana ştatında çıqışta bulunğanda o, Almaniya kantsleri Angela Merkel AQŞtan Avropanıñ qorçalamasını istey, amma aynı zamanda özü Rusiye ile gaz boyunca añlaşmalar yapa, dedi. Ondan ğayrı Tramp, Putin ile körüşüv kibi vaqialarğa bütün ömür azırlanğanını ve Rusiye lideriniñ onı «yeñip olamaycağından» emin olğanını söyledi.
