Ukrainada, ilhaq etilgen Qırımdan mecburen köçken balalar içün «Genç alimler içün yazlıq mektep»ni keçirmek maqsadınen paranıñ toplanması başlandı. «Alem» cemiyet teşklâtı, Küçük ilimler akademiyasınıñ «Qırımtatar hümanitaristikası» sektsiyasınen beraberlikte bunıñ teşkilâtçıları ola.
Teşkilâtçılarnıñ bildirgenine köre, leyha 13 yaşından 17 yaşınace balalar içün bir aftalıq medeniy-ilmiy programmanıñ keçirilmesini közde tuta. Onıñ esnasında talebeler qırımtatar tarihı, tili, medeniyeti ve sanatı boyunca bilgilerini terenleştire bilecekler.
Teşkilâtçılar, daa soñra «Genç alimler içün yazlıq mektep»niñ iştirakçileri 2018-2019 oquv senelerinde öz ilmiy işlerini Küçük ilimler akademiyasınıñ «Qırımtatar hümanitaristikası» sektsiyasında qorçalaycaqlar, dep qayd ettiler.
Bildirüvde: «Medeniy-bediiy alannı yaratuv, yani muzeyler ve resimler galereyalarını ziyaret etüv ve Kiev boyunca ekskursiya «Genç alimler içün yazlıq mektep» programmasınıñ ayırılmaz qısmı ola! Tamam bu areketler halqara münasebetlerdeki kerginlikni yoq etmege yardım etecek ve, ondan ğayrı, medeniyet ve sanat vastasınen balalarnıñ ukrain cemiyetine integratsiyasına hizmet etecekler», – denile.
Ukraina Küçük ilimler akademiyası bazasında 2017 senesiniñ dekabrinde umumtasil mektepleriniñ talebeleri içün «Qırımtatar hümanitaristikası» sektsiyası açıldı.
Ukrainanıñ qıtadaki qısmında qırımtatar tilini TMU ile bir arada Taras Şevçenko adına Kyiv Milliy universitetinde ögreneler.
