«Ukrainska pravda»nıñ muarriri Sevgil Musayeva-Borovik ve «Qırım evi»niñ programma müdiri Alim Aliyev «Mustafa Cemilev. Boysunmağan» kitabı içün Ukraina Milliy yazıcılar birligi mükâfatınıñ laureatları oldı.
Alim Aliyevniñ Qırım.Aqiqatqa bildirgenine köre, oña bunı iyül 6-da bildirdiler.
Aliyev: «Bu, Ukraina Milliy yazıcılar birliginiñ mükâfatı. Biz «Birinci kitap» nominatsiyasında ğalebe qazandıq. Bugün maña telefon açıp, bunı bildirdiler. Men olarğa barğan soñ, olar diplom berdi», – dep ikâye etti.
Kyivde «Mustafa Cemilev. Boysunmağan» kitabınıñ taqdimi 2017 senesi mart 17-de keçti.
Mevzuğa dair: «Qırım sakinleri içün unutılmağanlarını bilmek müimdir» – Sevgil Musayeva
Müellifler kitapqa baş qaraman ve diger qırımtatar milliy areketiniñ iştirakçileri ve sovet dissidentleri ile yapılğan intervyülerni kirsetti ve bunıñ kibi de ilhaq etilgen Qırımda şimdiki vaziyetke toqundılar.
«Mustafa Cemilev. Boysunmağan» eki tilde – rusça ve ukraince – 7 biñ nüshalıq umumiy tiraj ile çıqtı.
