«Hıdır dede» adlı birinci qırımtatar masal filmi çıqarılğanda esas qıyınlıq, 1783 senesinden evelki Qırım Hanlığınıñ devrini ğayrıdan yaratmaq edi. Bunı Qırım.Aqiqat Radiosı efirinde Qaradeniz production studiyasınıñ baş müdiresi Elzara İslâmova filmniñ yaratıluv tarihını izalarken ikâye etti.
Studiyanıñ müdiresi: «Bizde o devirniñ ğayrıdan yaratılması ile qıyınlıqlar çıqa edi. Lâkin kollektsionerler, şahsiy muzeylerniñ saipleri ve sadece hayriyeciler bizge seslene. Biz bu saadaki mutehassıslarnen pek çoq çalıştıq. Misal içün, aynı şu sanatşınaslarnı alsaq, olar insanlarnıñ yaşayışları, evleri, neden ve neni aşağanları ve bir-birlerinen münasebetleri nasıl edi, aytmaq mümkün ediler… Belli bir sebeplerden dolayı 20-nci ve atta 19-ncı asırdan başlap, bu devirniñ tarihı türlü usullarnen aytılmayıp qaldırıla, yasaq etile edi ve ilâhre», – dep qayd etti.
İyül 1-de Kyivde «Hıdır dede» qırımtatar masal filminiñ ilk kösterilüvi keçti. Ukraina telükesizlik hizmeti, Rusiyedeki «ziyankâr merkez»ge çalışqan kişilerniñ filmniñ kösterilmesine yol bermeycek olğanlarını bildire. Mahsus hizmetniñ malümatına köre, olar kinoteatr yanına piket ile çıqmaq ve film yaratuv teşebbüsçileri üstüne zelönka tökmek istey ediler. Faqat, SBUnıñ bildirgenine köre, suiqastçılar planlarını ömürge keçirmeden evel yaqalandı.
Ukrainada «Hıdır dede»niñ premyerası Kyivdeki «Jovten» kinoteatrında ötkerildi. Parallel olaraq Aqmescitte de kösterilüvler teşkil etildi.
