Rusiye Tış işleri nazirliginiñ malümatları, 2018 senesiniñ birinci kvartalında 19 427 ukrainalınıñ şeklen Ukraina vatandaşlığından vazgeçkenine ve Rusiye pasprotını alğanına şaatlıq ete.
Bu hususta Azatlıq Radiosı ve 112-Ukrainanıñ ortaq leyhası olğan «Donbass.Aqiqat» yayınında aytıla.
Bunıñnen beraber Rusiye müessisesiniñ statistikası, 2017 senesinde 85 119 ukrainalınıñ rusiyeli olğanını qayd etti.
Jurnalistler Rusiye Devlet dumasına teslim etilgen «Rusiye Federatsiyasında yabancı vatandaşlarınıñ uquqiy vaziyeti aqqında» ve «Rusiye Federatsiyasınıñ vatandaşlığı aqqında» qanunlardaki deñişmelerge dair 495240-7 nomeralı qanun leyhasını tetqiq ettiler.
Vesiqanıñ müellifleri olğan Rusiye deputatları, umumen eki million ukrainalınıñ ve şu cümleden Ukrainanıñ şarqından çıqqan 970 000 kişiniñ Rusiye territoriyasında daimiy surette bulunğanını iddia eteler.
Ukraina Devlet sıñır hizmeti reisiniñ muavini Oleg Slobodân «Donbass.Aqiqat»nıñ efirinde: «2017 senesinde biz Ukrainanıñ Rusiye ile sıñırınıda dört buçuq millionğa yaqın keçüvni qayd ettik», – dedi.
2017 senesinde 4,3 millionğa yaqın Ukraina vatandaşı Rusiyege bardı. Ondan çoq ukrainalılar Poloniyağa bardı. Statistikağa köre, bu devletniñ yönelişinde sıñırnı 10 million Ukraina vatandaşı keçti. Ondan ğayrı 3,1 million ukrainalı Macaristanğa bardı.
