Ukraina Telükesizlik hizmeti (SBU), «Rusiye tarafınıñ sımarışı ile» Kyivde yapılması planlaştırılğan qırımtatarlarğa qarşı tedbirniñ ögüni alğanı aqqında bildire. Bunı tünevin müessiseniñ matbuat hizmeti bildirdi.
Bildirüvde: «Ecnebiy ziyankâr merkezlerniñ niyetine köre, Ukrainada emirleri altında bulunğan şahıslar, bu yılnıñ iyül 1-nde «Jovten» kinoteatrinde ötkerilmesi planlaştırılğan «Hıdır-Dede» adlı birinci qırımtatar masal filminiñ taqdimine yol bermeycek ediler. Rusiye tarafınıñ kontroli altında bulunğan Ukraina vatandaşları Kyivde 100 qadar kişini para ile tutıp, olarnı sanki ukrain milletçileriniñ üç gruppasına bölmek kerek ediler», – denile.
Mahsus hizmette: «(Gruppalarnıñ) birincisi qırımtatar halqınıñ liderlerine qarşı narazılıq tedbirini keçirmek kerek edi. Ekincisi – zalda seyirciler arasında provokativ harakterge malik vereqalar atıp, dağıtmalı edi. Üçüncisi – film yaratılmasınıñ teşebbüsçileri üstüne «zelönka» (yeşil tüslü tibbiy spirt irintisi) tökmek kerek ediler. Provokatsiyanıñ keçirilmesine yol bermemek içün onıñ teşkilâtçılarını azırlıq keñeşi esnasında Kyivdeki cemiyet ğıdalanuv müessiseleriniñ birinde yaqaladılar. Olardan evelden azırlanğan «zelönka», provokativ mündericeli plakatlar, vereqalar ve ecnebiy kuratorlardan alınğan talimatnameler müsadere etildi», – dep qayd eteler.
Bildirüvde aytılğanına köre, cinaiy işniñ alıp barılması, Ukraina Cinayet kodeksindeki 161-nci maddeniñ 3-nci qısmında: vatandaşlarnıñ ırqqa, milletke ya da dinge ait olğanlarına köre müsaviyligini bozuv, şeklinde tayin etilgen cinayetniñ işlenmesi alâmetleri ile qayd etildi. Maddeniñ sanktsiyası, eki ile beş yıl arasındaki müddetke azatlıqtan marum etüv şeklinde cezalavnı közde tuta.
Ondan ğayrı, matbuat hizmetinde, qırımtatar halqına qarşı milletlerara zıddiyetniñ qozğalmasına yönetilgen tedbirni teşkil etkenlerniñ, iyün 20-de Macaristan elçihanesi yanındaki provokatsiyanıñ keçirilmesine alâqası olğanı tam olaraq belli, dep qayd eteler.
Bundan evel SBUda, mahsus hizmetniñ aks-keşfiyatı hadimleri prokuraturanıñ protsessual idaresi altında, Rusiye mahsus hizmetleri tarafından sımarış etilgen Harkivde UPA askerleriniñ eykeli yanındaki terroristik aktnıñ ögüni aldılar, dep bildirdiler.
