Rusiye, qabaatlanğanlarğa qarşı qanunsız usullarnı mükemmelleştirmek ve öz territoriyasında tatbiq etmek içün Qırım mahkeme organlarını qullana. Cümleden, qapalı mahkeme oturışuvlarınıñ keçirilmesi aqqında söz yürsetile. Bunı «Qırım birdemligi» birleşmesi iştirakçileriniñ ayda bir kere yapılğan körüşüvinde Qırım advokatı Emil Kurbedinov bildirdi.
Kurbedinov: «Biz bu usulğa birinci kere Aqyardaki «Hizb ut-Tahrir işi»nde rastkeldik. O vaqıt telükesizlik hadimleriniñ baş vazifelerinden biri, zulümleriniñ şaatları olmasın dep, mahkeme oturışuvlarına diñleyicilerni yibermemek edi. Şimdi, hususan Qırım Yuqarı mahkemesinde, aynı şeyler yapıla. Rusiyeli zenaatdaşlarımız bile bu tecribeniñ Qırımda mükemmelleştirilgenini aytalar», – dedi.
Aynı vaqıtta o, Qırım sakinlerini, mahkeme oturışuvlarınıñ qapalı olacağı evelden belli olsa bile, yarımadadaki mahkeme binaları yanına kelmege davet etti.
Advokat: «Qabaatlavnıñ maqsadı – insanlar siyasiy mabüslerniñ mahkemede aytqanlarını eşitmesinler, ve siyasiy mabüsler olarğa qol tutulğanını körmesinler. Ve bu vaziyette ıntılışlarnı toqtatmamaq ve mahkemeler yanına kelmek pek müim. Sizni oturışuv zalına yibermeseler bile, bu, adliyeciler ve advokatlar içün böyle buyruqqa qarşı şikâyet bermek içün sebep olacaq», – dep añlattı.
Ежемесячное собрание «Крымской солидарности» (фоторепортаж)
Bundan bir kün evel Aqmescitte «Qırım birdemligi» cemiyet birleşmesi iştirakçileriniñ oturışuvı keçti. Körüşüvde 80-ge yaqın kişi – Qırım siyasiy mabüsleri, advokatlar, qırımtatar ve ukrain faaliyetçileri toplandı.
İlhaqtan soñ Qırımda Rusiye ükümeti mustaqil jurnalistler, cemiyet faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli tanılğan Qırım musulmanlarınıñ evlerinde muntazam surette kütleviy tintüvler keçire.
