Link açıqlığı

Saatnıñ esas haberi

AŞPAda Rusiyedeki Ukraina mabüslerini azat etmek talabınen rezolütsiya qabul etildi


Avropa Şurasınıñ Parlament assambleyası iyün 28-de Rusiyede ve Ukrainanıñ kontroli altında olmağan territoriyadaki Ukraina mabüslerini azat etmek talabınen rezolütsiya qabul etti. Bunı öz Facebookında Ukraina Yuqarı Radasınıñ birinci vitse-spikeri İrina Heraşçenko yazdı.

Onıñ bilgirgenine köre, rezolütsiya içün 77 Avropa deputatı rey berdi.

Heraşçenko: «Qabul etilgen AŞPAnıñ rezolütsiyasında eziyetlevler ve uyğun olmağan tutuluv şaraitleri taqbih etile, çatışma zonası ile Rusiye tarafından işğal etilgen territoriyalarğa ve Rusiyede bulunğan Ukraina siyasiy mabüslerine Qızıl Haç Halqara komiteti ve diger hümanitar teşkilâtlarnı yibermek talabı aqqında söz yürsetile. AŞPA Rusiyege, Oleg Sentsov, Volodımır Baluh, Pavel Grib ve em işğal etilgen Donbass ve Qırımda, em de Rusiye apishanelerinde tutulğan diger siyasiy mabüsler ve esirlerni azat etmek talabınen müracaat etip, olarğa ombudsmenniñ yiberilmesini talap ete», – dep bildirdi.

Ondan ğayrı o, tib hadimleri ve hümanitar missiyalarnıñ yiberilmesine dair tüzetüvler ve, azat etilecekleri ya da etilmeyceklerine dair qararnı yalıñız Kreml çıqarğanı içün, işğal etilgen territoriyalarda qanunsız tutulğan Ukraina vatandaşlarını da Kremlniñ mabüsleri, reinleri olaraq tanımaq talabı qabul etildi, dep ayrıca qayd etti.

Ukraina deputatı: «Eminim ki, Strassburgda keçken bugünki pek müim, eyecanlı, dürüst munaqaşalardan soñ diger Avropa parlamentlerinde de münasip müzakereler yapılacaq ve mabüslerni azat etmek talabınen beyanatlar qabul etilecekler», – dep bildirdi.

Ukraina tarafı Rusiyeden, Rusiyede apis etilgen ve mayıs 14-te açlıq ilân etken Ukraina rejissörı Oleg Sentsov ile Moskva tarafından apis etilgen diger Ukraina vatandaşlarınıñ Ukrainada yaqalanğan 23 Rusiye vatandaşına deñiştirilmesini talap ete.

İyün 14-te Avropa parlamenti Rusiyeden, qanunsız yaqalanğan, tevqif ve apis etilgen bütün Ukraina siyasiy esirlerini deral azat etmege davet etti.

Rusiyede mahküm etilgen Ukraina rejissörı Oleg Sentsov mayıs 14-te, Rusiye apishanelerinde bulunğan bütün Ukraina siyasiy mabüslerni azat etmek talabınen muddetsiz açlıqnı ilân etti. Mayıs 31-de o, «deñiştirilmesi onı meraqlandırmağanını», çünki o, «soñuna qadar barğan adam» olğanını beyan etti.

Ukrainada ve bütün dünyada faaliyetçiler Rusiye ve prezident Vladimir Putinden qanunsız tutulğan Ukraina vatandaşlarınıñ azat etilmesini talap etmege devam eteler. Tedbirler türlü devletlerde ve türlü qıtalarda #FreeOlegSentsov ve #SaveOlegSentsov şiarları altında keçe.

XS
SM
MD
LG