Kremlniñ kontroli altında olğan Aqmescit rayon mahkemesi ekstremistik ifadeler qullandı dep şübheli tanılğan qırımtatar İsmail Ramazanovniñ tevqifini iyül 16-ğa qadar uzattı.
Qırım.Aqiqat muhbiriniñ bildirgenine köre, tahqiqatçı Ramazanovğa tevqif müddetini eñ az bir ayğa uzatmaqnı istey edi, çünki, onıñ fikrine köre, şübheli tanılğan şahıs tahqiqattan qaçmaq, tahqiqatqa tazyiq etmek ve delillerni yoq etmek mümkün.
Advokatnıñ, Ramazanov nasıl delillerni yoq etmek mümkün, degen sualine tahqiqatçı cevap berip olamadı. Bunıñ kibi de, imayeci mahkemege, tahqiqatnıñ «açıq bir surette» tahqiqatnı uzatqanına işaret etti. O, mahkemeden Ramazanov içün sıñırlav tedbiriniñ ev apisine deñiştirilmesini istedi.
Ramazanov öz imayecisine qol tuttı ve, Qırım onıñ vatanı olğanını ve apis telükesi olsa bile onı terk etmek niyetinde olmağanını ilâve etti.
Bu mevzuğa dair: Aleksey Ladin: «İsmail Ramazanovnıñ işinde milleti – qabaatnı ağırlağtırğan vaziyettir»
Mayısnıñ ortasında mahkeme Ramazanovnıñ tevqif müddetini iyün 16-ğa qadar uzattı.
İsmail Ramazanov, yanvar 23-te Rusiye telükesizlik hadimleri Novıy Mirdeki evini tintken soñ ekstremizmniñ propagandasında qabaatlanğan edi. Daa soñra mahkeme, şübheli tanılğanı bildirilgen şahısnı tevqif etti.
Daa soñra Rusiyeniñ Qırım boyunca Tahqiqat komitetinde, internet rediosı vastasınen ekstremistik materiallarnıñ tarqatılmasında qabaatlanğan Aqmescit rayonınıñ sakinine qarşı tergevciler tarafından cinaiy iş açıldı, dep bildirildi.
İlhaqtan soñ Qırımdaki faktik Rusiye ukümeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübheli sayılğan Qırım musulmanlarınıñ evlerinde muntazam surette kütleviy tintüvler keçire.
