Alupkada FSB hadimleri Naciye Kaydanovanıñ evini tintip, ondan soñ özüni idarege sorğuğa alıp ketti. Bunı iyün 20-de «Qırım birdemligi» birleşüvi bildirdi.
Bildirüvde: «Alupkadaki evi tintilgen soñ Naciye Kaydanovanıñ FSB idaresine alıp ketilgeni aqqında haber alındı. Ömür arqadaşı, telükesizligini temin etmek ve refaqat etmek içün onıñnen beraber ketti. Ondan ğayrı FSB binası yanına Naciyeniñ babası keldi», – denile.
Yaqalanğanlardan alınğan bilgilerge atıfta bulunğan faaliyetçilerniñ malümatına köre, Kaydanova ve onıñ ömür arqadaşı sorğudan soñ serbest bıraqıldılar.
Bildirilgenine köre, tintüv esnasında telükesizlik hadimleri bütün tehnikanı ve şu cümleden Naciye Kaydanovanıñ anasına ait telefonnı müsadere ettiler.
Rusiye telükesizlik hadimleri tarafından bu hususta açıq menbalarda izaat berilmedi. Qırım.Aqiqat vaqianıñ tafsilâtlarını ögrene.
2016 senesinde Kaydanovanıñ evi endi tintilgen edi. Onıñ neticesinde planşet ve telefonlar müsadere etildi, yaza «Qırım birdemligi».
İlhaqtan soñ Qırımdaki faktik Rusiye ukümeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübheli sayılğan Qırım musulmanlarınıñ evlerinde muntazam surette kütleviy tintüvler keçire.
