Link açıqlığı

Saatnıñ esas haberi

Qaradeniz Production: Qırım Medeniyet nazirligi ve «Millet» «Hıdır dede» filminiñ yaratıluvında iştirak etmediler


Qırımdaki Qaradeniz Production prodakşn-studiyası, Rusiyeniñ kontroli altında olğan Qırım KHVlerinde bildirilgen, «Hıdır dede» bediiy filmi içün kösterüv şeadetnamesiniñ «Qırım Cumhuriyeti medeniyet nazirliginiñ qol tutuvı ile» alınması aqqında malümatqa dair reddiyeni ilân etti. Qırım.Aqiqatta, Qaradeniz Production tarafından ilân etilgen beyanatnıñ bir kopiyası bar.

Prodakşn-studiyada, böyle beyanatlar – «menbası Qırımdaki «Krıminform» agentligi olğan ve ondan soñ malümatnı teşkermege vaqıt tapmağan diger haber resursları tarafından darqatılğan açıq bir dezinformatsiyadır, dep iddia eteler.

Bunıñ kibi de Qırım KHVlerinden birinde, filmniñ işlep çıqarılmasında Rusiyeniñ kontroli altında olğan «Millet» devlet qırımtatar teleşirketiniñ kollektivi iştirak etti, dep bildirile.

Prodakşn-studiyanıñ bildirüvinde: «Qaradeniz Production mesüliyet ile beyan ete ki, biz Devlet kinofilmler fondundan şeadetnameni, (qanun boyunca bunıñ içün 20 kün ayırılsa da) yalıñız 1,5 aydan soñ, belli bir manialarnı aşıp, mustaqil surette aldıq. Qırımtatarlarnıñ tarihındaki birinci masal filmi olğan «Hıdır dede» filmine «Millet» teleşirketiniñ iç bir alâqası yoq edi, yoq ve olması da mümkün degil», – denile.

Qırımdaki Qaradeniz Production prodakşn-studiyası «Hıdır dede» masal filminiñ çekimlerini yekünledi. Çekim gruppası Bağçasaray, Kezlev, Suvdağ, Büyük Özenbaş (Sçastlivoye), Büyük Kanyonda ve ondan ğayrı ev-muzeylerde ve ğayrından tiklenilgen qırımtatar qaraltılarında çalıştı.

Filmniñ senariyi üzerinde qırımtatar jurnalisti Lilâ Bucurova ile yazıcı ve tele alıp barıcısı Oleksa Hayvoronskiy çalıştılar.

XS
SM
MD
LG