Azatlıq Radiosı, Devlet departamentinde Qırımğa dair siyasetiniñ deñişmeycegini beyan etkenlerini bildire.
AQŞ Devlet departamentiniñ spikeri Hizer Nauert, AQŞ prezidenti Donald Trampnıñ «Yediler gruppası»nıñ körüşüvinde sanki, Qırım Rusiyege ait, dep beyan etkeni aqqında bir jurnalist tarafından berilgen sualge: «Bizim Qırımğa dair siyasetimiz deñişmegen alda buluna. Biz, dünya tarafından tanılğan sıñırlar içünde Ukrainanıñ topraq bütünligine qol tutamız. Bizim sanktsiyalar – Qırım sanktsiyalarımız – Rusiye, işğalini toqtatıp, Qırımnı Ukrainağa qaytarmağance quvette qalacaqlar», – dep cevap berdi.
Bu mevzuğa dair: Trampnıñ Qırım aqqında beyanatı: şaqa ya da AQŞ kursunıñ deñişmesimi?
Daa evel Amerikadaki BuzzFeed neşiri, öz menbalarına atıfta bulunıp, Trampnıñ iyün 8-de Kanadada «yediler gruppası»nıñ körüşüvi esnasında sanki, «Qırım Rusiyege ait, çünki andaki bütün sakinler rusça laf ete», dep beyan etkenini bildirdi. Ondan ğayrı, BuzzFeedniñ malümatına köre, o, Ukrainanı, «dünyada korruptsiyası eñ küçlü olğan devletlerinden biri», dedi.
Beyaz evniñ matbuat kâtibesi Sara Sanders bu malümtnı tasdiqlap ya da inkâr etip olamadı.
Bundan evel Tramp, Ukrinağa ait Qırımnıñ Rusiye tarafından ilhaqında öz selefi Barak Obamanı qabaatladı.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
