İyün 13-te Qırımda, Yaltağa kirgen Autka (Çehovo) köyünde Rusiye FSBsiniñ hadimleri qırımtatarlarnıñ evini tintti ve 27 yaşındaki qıznı yaqaladılar. Bunı Facebookta Qırım advokatı Edem Semedlâyev bildire.
Onıñ malümatına köre, qıznı Rusiye Cinayet kodeksiniñ 280-nci maddesi (Cemiyet içinde yapılğan ekstremistik areketlerge davet) boyunca qabaatlaylar.
Yaqalanğan hanımnıñ şimdi bulunğan yeri belli degil.
Qırım.Aqiqat adiseniñ tafsilâtlarını ögrenmege tırışa.
Rusiye telükesizlik muessiseleriniñ saytlarında tintüv ve yaqalanuv aqqında malümat şimdilik yoq.
İlhaqtan soñ Qırımdaki faktik Rusiye ukümeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler keçire.
