Link açıqlığı

Saatnıñ esas haberi

Kyivniñ merkezinde belli bir Ukraina brendi mallarınıñ tükânı öz vitrinalarında Rusiye apishanesnde açlıq tutqan Ukraina rejissörı Oleg Sentsovğa qol tutuv bannerlerini yerleştirdi.

Tükân saipleriniñ içtimaiy ağlarda bildirgenine köre, olar, böyle etip, Sentsovğa qol tutqanlarını ifade ete, çünki «olarnıñ yurtdaşı, dürüst ve cesür insannıñ elâk olmasına yol berip olamaylar ve bermek istemeyler».

Tükân saipleri, Facebooktaki saifelerinde: «Vitrinalarımız – sesimizdir. Olar paytahtnıñ baş soqağına çıqa. Olarnıñ yanında biñlerce kişi – em Ukraina, em de çet memleketleriniñ vatandaşları keçe. Biz, noqtai-nazarımıznı bildirmek içün vitrinamıznı deñiştirdik. Çünki Rusiyede qabaatsız olaraq 20 yıl apis cezasına mahküm etilgen yurdaşımız, kinorejissör Oleg Sentsov, açlıq ilân etti», – dep beyan eteler.

Yigirmi qadar Ukraina mallarınıñ istisalcısını birleştirgen tükânda başqalarnı da Oleg Sentsov ile birdemlik tedbirine qoşulmağa davet eteler.

Bildirüvde: «Vitrina ve pencerelerge saip olğan er kesni bizge qatılmağa davet etemiz. Kyiv ve memleketimizniñ bütün vitrinaları bir sesnen laqırdı etmek kerekler! Biz diqqatnı celp etmek kerekmiz ve bunıñ artından areketler olacağından eminmiz. Ukrainanıñ siyasiy mabüsleri cedvelinde yat kişiler yoq. Anda er kes bizimki», – denile.

Mayıs 16-da, Sentsovnıñ, Rusiye apishanelerinde bulunğan bütün Ukraina siyasiy mabüslerni azat etmek talabınen muddetsiz açlıq ilân etkeni belli oldı.

Mevzuğa dair: Oleg Sentsov – sert rejimli koloniyada 20 yıl. Ayşe Umerova Qırım rejissörınıñ ayatı ve faciası aqqında

Bu munasebet ile Ukraina prezidenti Petro Poroşenko qanunsız olaraq apishanelerde tutulğan Ukraina vatandaşlarınıñ eñ qısqa vaqıtta azat etilmesi içün halqara toplulığını Rusiyege tazyiqnı devam etmege davet etti.

Sentsov ve Qırım sakini Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesiniñ mayısında, yarımadada terroristik aktlar azırlağanlarında qabaatlanıp, yaqalandılar. 2015 senesiniñ ağustosında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıl sert rejimli koloniya cezasına mahküm etti. Kolçenkoğa 10 yıl koloniya berildi. Ekisi de qabaatlarını tanımadı.

«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti.

XS
SM
MD
LG