Link açıqlığı

Saatnıñ esas haberi

Moskvada Oleg Sentsovğa qol tutmaq içün keçirilgen bir kişilik piketniñ iştirakçisi yaqalandı


Mayıs 27-de Moskvada polis, Rusiye koloniyasında açlıq tutqan Ukraina rejissörı Oleg Sentsovğa qol tutmaq maqsadınen keçirilgen bir kişilik piketniñ iştirakçisini yaqaladı.

Bunı «OVD-İnfo», adı bildirilmegen yaqalanğan hanımğa atıfta bulunıp, bildire.

Onıñ aytqanına köre, o, plakat ile tura edi. Plakatta «Oleg Sentsov. Açlıq tutqanınıñ 14-nci künü» yazılğan edi. Onı polis bölügine alıp ketti ve resmen bildirmeyip tedbir keçirgeni içün protokol tizdiler.

Rusiyeniñ qanunlarına köre, bir kişilik piketniñ ötkerilmesi içün resmiy bildirüvni bermek kerekmey. Prezidentniñ emirine binaen, 2018 senesiniñ mayıs 25-ten iyül 28-ge qadar Futbol buyunca Dünya çempionatınıñ keçirilmesi munasebeti ile kütleviy tedbirlerniñ ötkerilmesi içün mahsus tertip işletile. Lâkin bu emirde bir kişilik piketler qayd etilmedi.

Sentsov ve Kolçenko Rusiye mahsus hizmetleriniñ vekilleri tarafından Qırımda 2014 senesiniñ mayısında, yarımadada terroristik aktlar azırlağanlarında qabaatlanıp, yaqalandılar. 2015 senesiniñ ağustosında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, sert rejimli koloniyada 20 yılğa mahküm etti. Kolçenkoğa 10 yıl koloniya berildi. Ekisi de qabaatlarını tanımadı.

«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti.

Ukraina rejissörı, Qırım sakini Oleg Sentsov Yamalo-Nenetsk muhtar okrugınıñ Labıtnangi şeerindeki 8 nomeralı («Beyaz ayuv» adlı) koloniyada buluna. Mayıs 16-da o, Rusiye ve Qırım apishanelerinde bulunğan bütün Ukraina siyasiy mabüslerni azat etmek talabınen açlıq ilân etti.

XS
SM
MD
LG