Mayıs 26-da «Zaporojyeniñ yañı draması» eksperimental teatri ve Amnesty International faaliyetçileri Oleg Sentsov ve Aleksandr Kolçenkoniñ mahkemesine bağışlanğan «Söz kesüv» pyesasınıñ oqulmasını teşkil ettiler. Bunı Qırım.Aqiqat muhbiri bildire.
Tedbirniñ teşkil eticisi, dramaturg Anastasiya Kosodiy: «Söz kesüv» pyesasınıñ adı, mundericesine iç bir alâqası olmağanı içün berildi. Rusiye mahsus hizmetleri nevbetteki kere teatrğa kelmesin, pyesanıñ Sentsovğa bağışlanğanını birden añlamasınlar, dep, pyesağa bu ad berildi. Metin tolusınen vesiqalı materiallarğa, mahkemede berilgen ifadelerge esaslana», – dep ikâye etti.
Tedbir esnasında iştirakçileri, Oleg Sentsovğa qol tutuv mektüplerini yazıp, olarnı kinorejissörğa koloniyağa yollamaqnı planlaştıralar.
Sentsov ve Kolçenko Rusiye mahsus hizmetleriniñ vekilleri tarafından Qırımda 2014 senesiniñ mayısında, yarımadada terroristik aktlar azırlağanlarında qabaatlanıp, yaqalandılar. 2015 senesiniñ ağustosında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, sert rejimli koloniyada 20 yılğa mahküm etti. Kolçenkoğa 10 yıl koloniya berildi. Ekisi de qabaatlarını tanımadı.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti.
Ukraina rejissörı, Qırım sakini Oleg Sentsov Yamalo-Nenetsk muhtar okrugınıñ Labıtnangi şeerindeki 8 nomeralı («Beyaz ayuv» adlı) koloniyada buluna. Mayıs 16-da o, Rusiye ve Qırım apishanelerinde bulunğan bütün Ukraina siyasiy mabüslerni azat etmek talabınen açlıq ilân etti.
