İsrail ordusınıñ qırıcı ucaqları filistinlilerniñ radikal «Hamas» areketiniñ Gazze şeritiniñ cenübinde bulunğan mevzilerine avadan darbe endirdiler.
İsrail arbiyleriniñ bildirüvinde, avadan darbe, Filistin muhtariyetiniñ bir qaç sakini tarafından İsrail sıñırını keçmek ve emniyet qorasını bozmaq teşebbüsine cevap oldı, dep qayd etile.
İsrail ava quvetleri mayıs 23-te endi «Hamas» mevzilerine ve bir qaç arbiy obyektke darbe endirgen ediler. O zaman İsrail arbyleri, ateşke tutuv, bir gruppa filistinlilerniñ sıñırnı bozıp keçkenine cevap olaraq yapıldı, dep bildirdiler.
Mart 30-dan başlap, İsrail ile Gazze şeritiniñ sıñırında İsrail askerleri ile çatışuvlarda 100-den ziyade filistinli elâk oldı.
Mayıs 14-te Filistin muhtariyeti sakinleriniñ AQŞ elçihanesiniñ Qudüske keçirilmesine qarşı narazılıq tedbiri esnasında 60-qa yaqın insan öldürildi.
O zaman narazılıq köstergenler şinalar yaqa ve askerlerge taşlar ve ağır şeyler ata ediler. Filistinliler israillilerni, barışıqlı narazılıq tedbirniñ bastırılması içün silânıñ qullanmalarında qabaatladılar. İsrailniñ baş naziri Benyamin Netanyahu arbiylerniñ areketlerine özüni qorçalav dep, olıp keçkenlerde «Hamas»nı qabaatladı.
