Rusiye ukümeti ilhaq etilgen Qırımğa qomşu Rusiyeden millionğa yaqın kişini ketirip yerleştirdi. Bunı Ukrainanıñ «Ukrinform» haber agentligi içün bergen intervyüde Ukraina prezidentiniñ qırımtatar halqınıñ işleri boyunca vekili, halq deputatı Mustafa Cemilev bildirdi.
Cemilev: «Olar (Rusiye ukümeti) Qırımğa büyük sayıda (diger bölgelerden) kişilerni ketirip yerleştireler. Lâkin bu, arbiy sır kibi gizlene, çünki olar, bunıñ cinayet olğanını pek yahşı bileler», – dedi.
O, 2014 senesinden soñ yarımadada qalğan Qırım sakinlerinden alğan malümatqa atıfta bulunıp, al-azırda 850 biñden millionğa qadar kişi aqqında söz yürsetilmek mümkün, dep qayd etti.
Deputat ayrıca: «Rusiye bugün, II-nci Yekaterina zamanındaki birinci işğal vaqtında qullanğan strategiyasını aynı şekilde tatbiq ete. O zaman demiryol, vagonlar olmağan içün insanlarnı sürgün etmek içün imkân yoq edi. Olar, insanlarnı icret etmege mecbur etmek içün sadece dayanılmaz yaşayış şaraitini yarattı, ve qırımtatarlar qısqa vaqıt içünde milliy azlıqqa çevirildiler», – dedi.
Aynı zamanda o, Qırımda içtimaiy ve emotsional vaziyetten dolayı yüksek ölüm seviyesi közetile, dep qayd etti.
Cemilev: «Resmiy malümatqa köre, işğal etilgen yarımadada ölüm seviyesi doğuv seviyesinden 38% yüksektir. Ve tarihta ilk defa qadınlardaki ölüm seviyesi erkeklerdekinden yüksek oldı», – dep ikâye etti.
Ekspertler, Rusiye vatandaşlarını ketirip yerleştirüv yolunen Qırım ealisiniñ demografik terkibiniñ deñiştirilmesini, halqara cinaiy mahkede baqılacaq eñ zalım arbiy cinayetlerinden biri, dep adlandıralar.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
