«Qızıltaş» futbol klubu özüniñ Bağçasaraydaki futbol meydanında Qırım çempionatınıñ 27-nci turundaki matçında «Rubin»ni 3:0 esabınen yeñdi. Bunı TASS bildire.
Toplarnı Artur Aymetdinov (9-ncı ve 41-nci daqqalar) ve Dmitriy Brovkin (88) urdılar.
Cumaertesi künü keçken diger matçlarda «Sevastopol» evde «Krımteplitsa»nı yeñdi (2:0), Keriçteki «Okean» musafirlikte Kefedeki «Kafa»ğa yutquzdı (0:2) ve daa evel çempionlıqnı elde etken «Yevpatoriya» öz meydanında «TSK-Tavriya»ğa yutquzdı (1:2).
Soñkiden evelki turnıñ neticeleri boyunca «Yevpatoriya»da 64 sayı bar, ondan soñ sıra ile «Sevastopol» (56), «TSK-Tavriya» (55), «Krımteplitsa» (47), «Qızıltaş» (29), «Okean» (23), «Kafa» (14) ve «Rubin» (13) keleler.
Turnirni keçirgen Qırım futbol birleşmesiniñ, Avropa futbol assotsiatsiyaları birliginde mahsus statusı bar ve o, 2015 senesi iyülniñ ortalarında resmen qayd etildi. Turnirde yarımadanıñ çeşitli bölgelerinden sekiz taqım iştirak ete. Qırımnıñ birinci çempionatı 2015/2016 mevsiminde olıp keçti ve «TSK-Tavriya» klubınıñ ğalebesinen yekünlendi, bıltır «Sevastopol» çempion oldı.
