Link açıqlığı

Saatnıñ esas haberi

Mayıs 27-de Kyivde, 2016 seneinde Qırımda alıp qaçılğan Dünya Qırımtatar Kongressi icra şurasınıñ azası Ervin İbragimovğa qol tutmaq maqsadınen arqadaşlıq matçı keçecek.

Teşkil eticiler: «Ervin İbragimovnıñ teşebbüsini devam ettirmek içün eki qırımtatar taqımı futbol meydanında bir arağa kelecek. On yıl devamında Ervin futbol oynadı, Qırım territoriyasında gençler arasında futbol turnirlerini teşkil ete ve özü de olarda iştirak etti. Bu yahşı bir anane oldı. Bıltır işğalci ukümet Qırımda faaliyetçilerge Ervinge qol tutuv matçınıñ keçirilmesini yasaq etti», – dep bildireler.​

Mevzuğa dair: Ervin İbragimovsız eki yıl

Futbol matçı Şevçenko adına Kyiv milliy universitetiniñ sport kompleksi bazasında Qırımtatar Milliy Meclisi, «QırımSOS» insan aqlarını qorçalav teşkilâtı ve cemiyet faaliyetçileriniñ qol tutuvı ile keçecek.

2016 senesiniñ mayısında Bağçasarayda belli olmağan şahıslar Dünya Qırımtatar Kongressi icra komitetiniñ azası Ervin İbragimovnı alıp qaçtılar. Videoközetüv kamerası, Rusiye yol inspektorları uniformasını kiygen eki kişiniñ, İbragimovnıñ maşinasını toqtatıp, özüni öz mikroavtobuslarına zornen kirsetkenlerini qayd etti.

Qırım insan aqlarını qorçalav gruppası, bu alıp qaçuvnıñ Rusiye ukümeti ya da onıñ kontroli altında olğan paramilitar gruppalar tarafından yapılğanını tahmin ete.

Rusiye Tahqiqat komitetiniñ Qırım boyunca Rusiyege tabi idaresi alıp qaçuv boyunca cinaiy iş açtı, lâkin Ervin İbragimovnıñ bulunğan yeri aqqında malümat bu küngece yoq.

XS
SM
MD
LG