«Qırım birdemligi»niñ faaliyetçisi Server Mustafayev birleşmeniñ iştirakçilerini, tevqifine baqmayıp, işini devam ettirmege davet ete. Bunı advokatı Sergey Legostov mayıs 26-da «Qırım birdemligi»niñ oturışuvında söyledi, dep bildire Qırım.Aqiqat muhbiri.
Advokatnıñ aytqanına köre, tahqiqat izolâtorında körüşüvleri esnasında Mustafayev ondan, bunı faaliyetçilerge aytmağa rica etti.
Legostov: «Bu künlerde Servernen körüştim. O, menim «Qırım birleşmesi»niñ bu oturışuvında olacağımnı bilgen soñ, oña ve diger siyasiy mabüslerge qol tutqanlarnıñ epsine minnetdarlığını bildirmemni rica etti. Ve ondan ğayrı o, episinden teslim olmamağa rica etti, ve «Qırım birdemligi»niñ, bir şeyge baqmayıp, işini devam ettirmek keregini ayta edi», – dedi.
Mevzuğa dair:Server Mustafayevniñ tevqif etilmesi «insanlarnı birleştirecek» – advokat
Öz nevbetinde Server Mustafayevniñ ömür arqadaşı Maye, onıñ azat etilmesi içün küreşmekni vade etti. «Yüregimiz teprengence ve damarlarımızda qan aqqance biz toqtamamız», – dedi o.
Server Mustavayev ile bir künde yaqalanğan Bağçasaray sakini Edem Smailovnıñ ömür arqadaşı Lilâ Smailova da faaliyetçilerni birdemlikte olmağa davet etti.
«Tintüv kününde evimizniñ yanına bizge qol tutmaq içün pek çoq kişi keldi. Cinayetçilerge qol tutmaq içün kelmeyler. Halqnen beraber zorluqlarnı, ağrı ve quvançlarnı paylaşqanlarğa keleler. Men halqımnı birlikte olmağa çağıram, çünki quvetimiz – birliktedir», – dedi o.
«Qırım birdemligi»niñ faaliyetçisi Server Mustafayev FSB hadimleri tarafından mayıs 21-de Bağçasarayda yaqalandı.
Onıñnen beraber Bağçasaray rayonındaki Topçıköy (Dolinnoye) köyüniñ sakini Edem Smailov – soñki on beş yıl içinde Bağçasarayda musulman diniy merasimlerini keçirgen imanlı musulmannı yaqaladılar.
Olar ekisi de Rusiyede yasaq etilgen «Hizb ut-Tahrir» musulman din teşkilâtında iştirak etkenlerinden şübheli sayıla.
İlhaqtan soñ Qırımdaki faktik Rusiye ukümeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler keçire.
