Mayıs 25-te Kyivde Ukrainadaki Rusiye elçiliginiñ binasını alev ve Rusiyede açlıq tutqan Ukraina rejissörı Oleg Sentsov ve Kremlniñ diger siyasiy mabüsleriniñ suretleri ile qoşumça yarıqlandırdıla.
Bildirilgenine köre, onlarca insan, binanı proyektor yardımınen «yaqılğanını» körmek içün elçilik yanındaki tedbirge çıqtı.
Ondan ğayrı, proyektor vastasınen binada, açlıq tutqan Sentsov azat etilmelerini talap etken siyasiy mabüslerniñ suretleri aks ettirildi.
Tedbirde sabıq siyasiy mabüs Gennadiy Afanasyev de köründi.
Mayıs 16-da, Sentsovnıñ, Rusiye apishanelerinde bulunğan bütün Ukraina siyasiy mabüslerni azat etmek talabınen muddetsiz açlıq ilân etkeni belli oldı.
Bu munasebet ile Ukraina prezidenti Petro Poroşenko qanunsız olaraq apishanelerde tutulğan Ukraina vatandaşlarınıñ eñ qısqa vaqıtta azat etilmesi içün halqara toplulığını Rusiyege tazyiqnı devam etmege davet etti.
Mevzuğa dair: Oleg Sentsov – sert rejimli koloniyada 20 yıl. Ayşe Umerova Qırım rejissörınıñ ayatı ve faciası aqqında
Sentsov ve Qırım sakini Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesiniñ mayısında, yarımadada terroristik aktlar azırlağanlarında qabaatlanıp, yaqalandılar. 2015 senesiniñ ağustosında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, sert rejimli koloniyada 20 yılğa mahküm etti. Kolçenkoğa 10 yıl koloniya berildi. Ekisi de qabaatlarını tanımadı.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti.
