Link açıqlığı

Saatnıñ esas haberi

Kyivde Sentsovnı azat etmek talabı ile mektüpniñ tübünde belli sportçularnıñ imzalarını toplaylar


Oleg Sentsov

Kyivde, Rusiyede mahküm etilgen Ukraina kinorejissörı Oleg Sentsovnı azat etmek talabı ile muracaat tübünde belli sportçularnıñ imzalarını toplaylar. Bunı Kyiv şeer devlet memuriytiniñ (KŞDM) matbuat hizmeti bildire.

Kyivniñ memuriyeti, muellifi paytahtnıñ belediye başlığı Vitaliy Klıçko olğan mektüpni endi Ukrainanıñ futbol boyunca cıyma taqımınıñ sabıq oyuncısı Yevgeniy Levçenko, qadınlar arasında Çempionlar ligasınıñ elçisi İya Andrişçak, Ukrainanıñ futbol boyunca cıyma taqımınıñ baş treneri Andrey Şevçenko, angliyalı futbol fristayleri Billi Vingrov, Yamaykanıñ futbol boyunca cıyma taqımınıñ oyuncısı Ceremi Linç, Fransanıñ cıyma taqımı ve «Marsel», «Milan» ve «Çelsi» klublarınıñ sabıq oyuncısı Marsel Desai, «Liverpul»niñ sabıq oyuncısı Sten Kollimor, Portugaliyanıñ cıyma taqımı ve «Çelsi»niñ sabıq oyuncısı Joze Bozingva, Ukraina boksçusı Volodımır Klıçko ve diger sprotçular imzaladılar, dep bildire.

KŞDMniñ matbuat hizmeti: «Öz vatandaş noqtai-nazarını ifadelemege cesaret etken istidatlı sanatkârnı uydurılğan bir iş boyunca apishanede tutqanları bir masqaralıqtır. Olegniñ sağlığı surat ile bozula. Ve o, parmaqlıqlar artında qalsa, biz yetişmey bilemiz, bir facia olacaq», – dep, mektüpniñ metnini naqil ete.

Mayıs 16-da, Sentsovnıñ, Rusiye apishanelerinde bulunğan bütün Ukraina siyasiy mabüslerni azat etmek talabınen muddetsiz açlıq ilân etkeni belli oldı.

Mayıs 22-de Rusiyedeki Kopeysk şeeriniñ koloniyasında bulunğan Ukraina siyasiy mabüsi Aleksandr Kolçenko, apis etilgen Oleg Sentsovnen beraber açlıq tutmağa azır olğanını bildirdi.

Bu munasebet ile Ukraina prezidenti Petro Poroşenko qanunsız olaraq apishanelerde tutulğan Ukraina vatandaşlarınıñ eñ qısqa vaqıtta azat etilmesi içün halqara toplulığını Rusiyege tazyiqnı devam etmege davet etti.

Mevzuğa dair: Oleg Sentsov – sert rejimli koloniyada 20 yıl. Ayşe Umerova Qırım rejissörınıñ ayatı ve faciası aqqında

Sentsov ve Kolçenko Rusiye mahsus hizmetleriniñ vekilleri tarafından Qırımda 2014 senesiniñ mayısında, yarımadada terroristik aktlar azırlağanlarında qabaatlanıp, yaqalandılar. 2015 senesiniñ ağustosında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, sert rejimli koloniyada 20 yılğa mahküm etti. Kolçenkoğa 10 yıl koloniya berildi. Ekisi de qabaatlarını tanımadı.

«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti.

XS
SM
MD
LG