Avropa Birliginde, Rusiye ve onıñ tarafından ilhaq etilgen Qırımda bütün qanunsız mahküm etilgenlerniñ, vaqıt uzatmadan, azat etileceklerini bekleyler. Bunı Azatlıq Radiosı muhbirine ABniñ tış işleri boyunca matbuat kâtibi Maya Kosyançiç söyledi.
Kosyançiç: « Sibirniñ şarqına sürgün etilgen rejissör Oleg Sentsov 2018 senesi mayıs 14-te, apis etilgeniniñ dört yılından soñ açlıq tutmağa başladı. Daa bir qanunsız mahküm etilgen Ukraina vatandaşı Volodımır Baluh endi eki aydan berli açlıq tuta. Olar Qırım yarımadasınıñ qanunsız ilhaqına narazılıq bildire edi ve ABde yurisdiktsiyaları tanılmağan mahkemeler tarafından, halqara uquqnıñ ve adliyeniñ elementar standartlarınıñ bozuluvı ile mahküm etildiler», – dedi.
Ondan ğayrı o, yarımadada qırımtatarlarğa qarşı taqipniñ devam etkenine diqqat çekti. Şu cümleden, o, mayıs 21-de Rusiye ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtında iştirak etkenlerinde qabaatlanğan «Qırım birdemligi» koordinatorı Server Mustafayev ve qırımtatar, musulman Edem Smailovnıñ yaqalanmasını hatırlattı.
Mayıs 16-da, Sentsovnıñ, Rusiye apishanelerinde bulunğan bütün Ukraina siyasiy mabüslerni azat etmek talabınen muddetsiz açlıq ilân etkeni belli oldı.
Volodımır Baluh, özü uydurmalardır degen mahkeme taqiplerine narazılıq bildirip, 2018 senesi mart 19-da ilân etken muddetsiz açlıqnı tutmağa devam ete.
Ukraina prezidenti Petro Poroşenko qanunsız olaraq apishanelerde tutulğan Ukraina vatandaşlarınıñ eñ qısqa vaqıtta azat etilmesi içün halqara toplulığını Rusiyege tazyiqnı devam etmege davet etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
